Համերաշխություն հանուն առողջության․ ԵՄ–ն և ԱՀԿ–ն թթվածնի խտացուցիչներ են փոխանցել Հայաստանին

Ապրիլի 7-ին Եվրոպական միությունը և Առողջապահության համաշխարհային կազմակերպությունը Հայաստանի Հանրապետության առողջապահության նախարարությանը փոխանցել են 100 թթվածնի խտացուցիչ։ Թթվածնի խտացուցիչների հանձնումն իրականացվել է Եվրոպական միության և ԱՀԿ-ի համատեղ ջանքերով՝ «Համերաշխություն հանուն առողջության» նախաձեռնության շրջանակում, որի նպատակն է  օգնել կանխել, հայտնաբերել և արձագանքել COVID-19 համավարակին՝ ԵՄ Արևելյան հարևանության երկրներում։

Թթվածնի խտացուցիչները COVID-19-ով հոսպիտալացված հիվանդներին թթվածնով ապահովելու ոչ ինվազիվ միջոց են։ Դրանք ծառայելու են որպես առաջին անհրաժեշտ քայլ՝ COVID-19-ի ծանր ընթացքի դեպքում արյան մեջ թթվածնի ցածր մակարդակ ունեցողների բուժման համար:

«Այս դժվարին ժամանակաշրջանում մենք տրամադրել ենք աջակցություն տնտեսական աճի ուղղությամբ, աջակցել հիվանդանոցներին՝ ապահովելով եվրոպացի մասնագետների այցեր, օգնել հեռավար կրթության հասանելիության ապահովման հարցում, և ամենակարևորը՝ համավարակի ընթացքում աջակցել ենք Հայաստանին փրկելու մարդկանց կյանքեր։ Հավատացած եմ՝ թթվածնի խտացուցիչների տրամադրումը կօգնի մեղմել համավարակի ընթացքում առաջացած սթրեսն ու ճնշումները հիվանդանոցներում, բժիշկների և բուժքույրերի շրջանում՝ նպաստելով կյանքեր փրկելու և ՀՀ քաղաքացիների առողջության պահպանմանն ուղղված նրանց գործին»,- նշել է Հայաստանում ԵՄ դեսպան Անդրեա Վիկտորինը։

Նախաձեռնության շրջանակում ընդհանուր առմամբ տրամադրվել է 100 թթվածնի խտացուցիչ, որոնք բաշխվել են Հայաստանում համավարակին սպասարկող հիվանդանոցների միջև, 50 հազարից ավելի անհատական պաշտպանիչ միջոց, 11 պացիենտի մոնիտոր, 20 էլեկտրասրտագրության սարք և 20 հազար բարձրորակ ՊՇՌ թեստ։ Ի լրումն՝ առաջիկա ամիսներին Հայաստան կառաքվեն 22 արհեստական շնչառության սարք և 7 ֆտորոգրաֆիայի ստացիոնար սարքավորում։

Իմացիր ավելին

Մամուլի հաղորդագրություն