Спецыяльны прадстаўнік ЕС па правах чалавека: палітвязні Беларусі, чыё здароўе або жыццё знаходзяцца пад пагрозай, павінны быць вызваленыя па гуманітарных меркаваннях

21 траўня, у Міжнародны дзень салідарнасці з палітвязнямі ў Беларусі, Спецыяльны прадстаўнік ЕС па правах чалавека Кайса Олангрэн заклікала ўлады Беларусі вызваліць па гуманітарных меркаваннях тых палітычных зняволеных, чыё здароўе або жыццё знаходзяцца пад пагрозай.

Дзень салідарнасці з палітвязнямі ў Беларусі быў заснаваны беларускім праваабарончым цэнтрам “Вясна” ў выгнанні ў 2022 годзе, у першую гадавіну смерці палітвязня Вітольда Ашурка. Вітольд Ашурак памёр у Шклоўскай папраўчай калоніі № 17 21 траўня 2021 года. З цягам часу гэты дзень стаў штогадовай міжнароднай праваабарончай кампаніяй.

Кайса Олангрен апублікавала ў «Х», што з 21 траўня 2021 года ў месцах пазбаўлення волі ў Беларусі загінулі яшчэ як мінімум васьмёра палітычных зняволеных.

“Іх смерці падкрэсліваюць вострую рызыку, з якой сутыкаюцца палітычныя зняволеныя, якія знаходзяцца ў найбольш небяспечным становішчы — тыя, чыё далейшае знаходжанне за кратамі стварае непасрэдную пагрозу для іх здароўя або жыцця. Усе такія асобы павінны быць вызваленыя па гуманітарных меркаваннях”,– зазначыла Кайса Олангрэн.

У іншым допісе  на X яна назвала па імёнах ўсе дзевяць палітычных зняволеных у Беларусі з цяжкімі захворваннямі.

Спецыяльны прадстаўнік ЕС па правах чалавека таксама падкрэсліла выпадкі трох палітычных зняволеных у Беларусі, якім больш за 70 гадоў, і трох палітычных зняволеных , якім на момант затрымання (або здзяйснення нібыта правапарушэнняў) было менш за 18 гадоў.

Даведацца больш

Допіс Кайсы Олангрэн на X