ვარშავის ევროატლანტიკური საზაფხულო აკადემია აღმოსავლეთ პარტნიორობის ქვეყნებიდან მონაწილეებს იწვევს

ვარშავის ევროატლანტიკურმა საზაფხულო აკადემიამ (WEASA) 2024 წლისთვის მონაწილეთა მიღება დაიწყო. საზაფხულო სკოლა 1-10 ივლისს ვარშავაში, ევროპის კოლეჯის ნატოლინის კამპუსში გაიმართება.  

WEASA ყოველწლიური საზაფხულო სკოლაა, რომელში მონაწილეობის მიღებაც შეუძლიათ კარიერის შუა საფეხურზე მყოფ პროფესიონალებს აღმოსავლეთ პარტნიორობიდან და დასავლეთ ბალკანეთიდან. სკოლა ევროკავშირის მიერ დაფინანსებულმა ევროპის კოლეჯის ნატოლინის კამპუსმა, პოლონურ-ამერიკულმა თავისუფლების ფონდმა და შეერთებული შტატების გერმანიის მარშალის ფონდმა დააფუძნეს. 

ამ წლის თემაა „იმპულსის ძიება. ევროატლანტიკური ინტეგრაციის მხარდაჭერა კრიზისულ დროებაში“. აკადემია საზაფხულო სკოლის მონაწილეებს მისცემს შესაძლებლობას, განიხილონ ევროკავშირის გაფართოებასთან, უსაფრთხოებასა და გეოპოლიტიკასთან დაკავშირებული აქტუალური საკითხები, გაუზიარონ ერთმანეთს გამოცდილებები და იპოვონ გზები ევროატლანტიკური ინტეგრაციის პროცესის წინ წასაწევად. ამას გარდა, WEASA 2024 მონაწილეებს დაეხმარება, შეიძინონ ახალი უნარები და უკეთ გაიაზრონ ის გამოწვევები, რომლებსაც მათი ქვეყნები ევროინტეგრაციის პროცესში აწყდებიან. პროგრამა აერთიანებს ლექციებს, სამუშაო შეხვედრებს, დებატებსა და ინდივიდუალურ სესიებს უნარების გასავითარებლად.

WEASA იწვევს, სულ მცირე, ხუთწლიანი სამუშაო გამოცდილების მქონე პროფესიონალებს: პოლიტიკის ანალიტიკოსებს, ექსპერტებს, მრჩევლებს, სახელმწიფო მოხელეებს, ჟურნალისტებს, კერძო სექტორის სპეციალისტებსა და არასამთავრობო ორგანიზაციების თანამშრომლებს, რომლებიც აღმოსავლეთ პარტნიორობისა და დასავლეთ ბალკანეთის ქვეყნების მოქალაქეები არიან. 

ორგანიზატორები დაფარავენ მონაწილეთა სამგზავრო ხარჯებს 350 ევრომდე და უზრუნველყოფენ საცხოვრებელსა და საკვების საფასურს საზაფხულო სკოლის მსვლელობის განმავლობაში. 

განაცხადების შეტანის ბოლო ვადაა 2024 წლის 26 აპრილი. 

დამატებითი ინფორმაცია

პრესრელიზი