ნარჩენების შემცირებისა და ცირკულარული ეკონომიკის განვითარების საგრანტო პროგრამა საქართველოში

გაეროს განვითრების პროგრამა (UNDP), ევროკავშირის მიერ დაფინანსებული ერთობლივი პროგრამის ფარგლებში „მწვანე, ინკლუზიური და ცირკულარული ეკონომიკა:  ნარჩენების შემცირება და გადამუშავება მოქალაქეთა ჯანმრთელობისთვის“: აცხადებს საგრანტო კონკურსს საქართველოში მწარმოებლის გაფართოებული ვალდებულების (მგვ) ნარჩენების მართვის სისტემების ჩამოყალიბების მხარდასაჭერად ევროკავშირის სტანდარტებთან შესაბამისობაში.

საგრანტო კონკურსი მიზნად ისახავს მწარმოებლის პასუხისმგებლობის ორგანიზაციების (PRO) და სამოქალაქო საზოგადოების ორგანიზაციების (CSO/NGO) ხელშეწყობას, რათა მათ განახორციელონ პრაქტიკული და გაზომვადი ღონისძიებები ნარჩენების შემცირების, ხელახალი გამოყენების და/ან გადამუშავების მიმართულებით მწარმოებლის გაფართოებული ვალდებულების (EPR) შვიდი სამიზნე ნაკადიდან, სულ მცირე, ერთში:

• გამოყენებული პორტატული ბატარეები და აკუმულატორები;
• გამოყენებული ტყვიის მჟავას ბატარეები;
• ნარჩენი ზეთები;
• ნარჩენი ელექტრო და ელექტრონული მოწყობილობები;
• შეფუთვა;
• საბურავები ექსპლუატაციის ვადის ამოწურვის შემდეგ;
• ავტომობილები ექსპლუატაციის ვადის ამოწურვის შემდეგ.

საგრანტო პროგრამა დააფინანსებს როგორც კაპიტალურ ინვესტიციებს ინფრასტრუქტურაში, ტექნიკასა და ტექნოლოგიებში, ასევე ოპერაციული პროცესების ეფექტიანობის გაზრდას და ინოვაციური სერვისის მოდელების დანერგვას, თუ ისინი პირდაპირ უკავშირდება ნარჩენების მართვის სისტემების (შეგროვება, შენახვა, ტრანსპორტირება, დამუშავება, გადამუშავება, ხელახალი გამოყენება და/ან აღდგენა) გაძლიერებას. აუცილებელია, შემოთავაზებულმა პროექტმა მკაფიოდ წარმოაჩინოს, რომ დაგეგმილი აქტივობები ხელს უწყობს კონკურსით განსაზღვრული ნარჩენების ნაკად(ებ)ის მართვას ე.წ. 4R პრინციპიდან (შემცირება, ხელახალი გამოყენება, გადამუშავება ან აღდგენა), სულ მცირე, ერთ-ერთის შესაბამისად. 

კონკურსში მონაწილეობის მსურველებს უნდა ჰქონდეთ: ნარჩენების მართვისა და ცირკულარული ეკონომიკის განვითარების მიმართულებით მუშაობის მინიმუმ
2-წლიანი გამოცდილება და პროექტის განსახორციელებლად მინიმუმ
10-პროცენტიანი თანადაფინანსების უზრუნველყოფის ვალდებულება (თანხით, ან პროდუქტებით/სერვისებით).

განაცხადების შეტანის ბოლო ვადაა 1 მაისი. 

დამატებითი ინფორმაცია

პრესრელიზი

გთხოვთ გაითვალისწინოთ, რომ შესაძლო ცვლილებებმა საქართველოს სამართლებრივ და სარეგულაციო გარემოში შესაძლოა გავლენა მოახდინოს ამ კონკურსისა და მის ფარგლებში მხარდაჭერილი აქტივობების განხორციელებაზე.