ინოვაციის ევროპული დედაქალაქის 2024 წლის კონკურსზე განაცხადების მიღება დაიწყო

ევროკომისიამ მეათედ გამოაცხადა ინოვაციის ევროპული დედაქალაქის კონკურსი (iCapital). ჯილდოები გადაეცემათ ევროპულ ქალაქებს, რომლებიც ყველაზე წარმატებით იყენებენ ინოვაციებს თავიანთი მოქალაქეების ცხოვრების გასაუმჯობესებლად. 

კონკურსი შეარჩევს ექვს პრიზიორს ორ კატეგორიაში: ინოვაციის ევროპული დედაქალაქი და მზარდი ინოვაციური ქალაქი. 

ინოვაციის ევროპული დედაქალაქის წოდების მომპოვებელ ქალაქს 1 მილიონი ევრო გადაეცემა. ამ კატეგორიაში მეორე და მესამე ადგილებზე გასულები კი 100,000  ევროს ოდენობის პრიზებს მიიღებენ. 

მზარდი ინოვაციური ქალაქის კატეგორიაში გამარჯვებული 500,000 ევროთი დაჯილდოვდება, მეორე და მესამე ადგილზე გამსვლელებიდან კი თითოეული 50,000 ევროს მიიღებს.

ამასთან, ყველა დაჯილდოებულ ქალაქს EIC Prizes Alumni ქსელში გასაწევრიანებლად მიიწვევენ. ესაა  iCapital-ის ყოფილი გამარჯვებულებისგან შემდგარი პრესტიჟული ჯგუფი, რომლის წევრებიც ერთმანეთს საკუთარ ცოდნას უზიარებენ, საერთო გამოწვევებს განიხილავენ და გადაჭრის გზებს ერთად ეძებენ. 

კონკურსში მონაწილეობა შეუძლიათ სულ  მცირე 50,000 მოსახლისგან შემდგარ ქალაქებს ევროკავშირის წევრი სახელმწიფოებიდან და „ჰორიზონტ ევროპასთან“ ასოცირებული ქვეყნებიდან, რომელთა რიცხვში საქართველოც არის. 

განაცხადების მიღების ბოლო ვადაა 2024 წლის 18 ივნისი (17:00 CET).

პოტენციური აპლიკანტებისთვის საინფორმაციო ონლაინშეხვედრა დაგეგმილია 9 აპრილს. მასზე დასასწრებად რეგისტრაციის გავლა შესაძლებელია ამ ბმულზე. 

დამატებითი ინფორმაცია

პრესრელიზი

კონკურსის წესები

ინოვაციის ევროპული დედაქალაქის კატეგორია

მზარდი ინოვაციური ქალაქის კატეგორია