Capture26: ევროპოლი სამართალდაცვის თემაზე ფოტოკონკურსისთვის განაცხადების მიღებას იწყებს

ევროკავშირის სამართალდამცავი სააგენტო, ევროპოლი სამართალდაცვის თემაზე ყოველწლიური საერთაშორისო ფოტოკონკურსის, Capture26-ისთვის  განაცხადების მიღებას იწყებს. 

წელს კონკურსის თემაა #OneSecurity („ერთი უსაფრთხოება“), რომელიც ასახავს პრინციპს, რომ ევროპული უსაფრთხოება კოორდინაციას, ნდობასა და საერთო პასუხისმგებლობას ეფუძნება. კონკურსანტებს ევალებათ, ასახონ, თუ როგორ გამოიყურება ეს თანამშრომლობა პრაქტიკაში. 

კონკურსი ღიაა პროფესიონალი და დამწყები ფოტოგრაფებისთვის, რომლებიც ევროკავშირის სახელმწიფოებისა და „ევროპოლის შეთანხმების“ ხელმომწერი ქვეყნების (მათ შორის საქართველოს, მოლდოვისა და უკრაინის) სამართალდამცავ ორგანოებში მუშაობენ.

კონკურსი პირველად 2009 წელს ჩატარდა და მას მერე მოიზიდა ნამუშევრები პოლიციის, საბაჟოს, სასაზღვრო დაცვისა და უსაფრთხოების სამსახურებიდან ევროპის მასშტაბით და მის ფარგლებს გარეთაც.

განაცხადების მიღების ბოლო ვადაა 2026 წლის 14 აგვისტო. 

განაცხადები ევროპოლის ვებსაიტზე განთავსებული ფორმის შევსებით მიიღება. 

ევროპოლის შტაბ-ბინა ნიდერლანდებში, ჰააგაში მდებარეობს და მისი მისიაა, მხარი დაუჭიროს წევრ სახელმწიფოებს ყველა სახის სერიოზულ საერთაშორისო და ორგანიზებულ დანაშაულთან, კიბერდანაშაულთან და ტერორიზმთან ბრძოლაში. ევროპოლი ასევე მუშაობს ევროკავშირის არაწევრ პარტნიორ სახელმწიფოებთან და საერთაშორისო ორგანიზაციებთან. 

დამატებითი ინფორმაცია

პრესრელიზი

კონკურსის შესახებ განცხადება