ევროკავშირი „გენდერული თანასწორობის მცველების“ კონკურსს აცხადებს – განაცხადები 18 ივნისამდე მიიღება

2022 წლიდან მოყოლებული, ევროკომისია გენდერული თანასწორობის მცველის პრიზით აჯილდოებს ინსტიტუციებს, რომლებმაც ყველაზე ეფექტიანი გენდერული თანასწორობის გეგმები (GEPs) განახორციელეს.

ეს ინსტიტუციები შეიძლება იყოს უნივერსიტეტები, უმაღლესი საგანმანათლებლო დაწესებულებები და სხვა (სახელმწიფო თუ კერძო) კვლევითი ორგანიზაციები, რომლებიც ევროკავშირის წევრ სახელმწიფოებსა და „ჰორიზონტი ევროპის“ პროგრამასთან ასოცირებულ ქვეყნებში (მათ შორის საქართველოში) არიან დაფუძნებულები. 

პრიზები სამ კატეგორიაში გაიცემა:

1. მდგრადი გენდერული თანასწორობის მცველები: ორგანიზაციები, რომლებმაც გენდერული თანასწორობის გეგმის განხორციელებით მნიშვნელოვან და მდგრად წარმატებას მიაღწიეს.
2. გენდერული თანასწორობის ახალბედა მცველები: ორგანიზაციები, რომლებმაც ახლახან შეასრულეს თავიანთი პირველი გენდერული თანასწორობის გეგმა და მისი განხორციელებისას ყველაზე დიდ პროგრესს მიაღწიეს.
3. ინკლუზიური გენდერული თანასწორობის მცველები: ორგანიზაციები, რომლებმაც გენდერული თანასწორობის გეგმის განხორციელებით კონკრეტულ შედეგებს მიაღწიეს. ეს შედეგები ერთდროულად უნდა იყოს დაკავშირებული გენდერისა და სულ მცირე ორ ისეთ სხვა სოციალურ კატეგორიასთან, როგორიცაა რასობრივი თუ ეთნიკური წარმომავლობა, სოციალური წარმოშობა, სექსუალური ორიენტაცია თუ გენდერული იდენტობა და შეზღუდული შესაძლებლობა.

შედეგები 2026 წელს დაგეგმილ დაჯილდოების ცერემონიაზე გახდება ცნობილი. თითოეული გამარჯვებული 100,000 ევროს ოდენობის ჯილდოს მიიღებს.

კონკურსში მონაწილეობის მსურველებს განაცხადის შეტანა შეუძლიათ სამიდან მხოლოდ ერთ კატეგორიაში. გასული წლების კონკურსების გამარჯვებულებს სხვა კატეგორიაში განაცხადის ხელახლა შეტანა არ შეუძლიათ.

განაცხადების მიღების ბოლო ვადაა 2025 წლის 18 ივნისი.

დამატებითი ინფორმაცია

პრესრელიზი

გენდერული თანასწორობის მცველების პრიზი

გენდერული თანასწორობის გეგმები

კონკურსის წესები