Մեկնարկել է ԵՄ «Գենդերային հավասարության չեմպիոն» մրցանակի համար մրցույթը

2022 թվականից ի վեր Եվրոպական հանձնաժողովը ճանաչման է արժանացնում առավել ազդեցիկ գենդերային հավասարության ծրագրեր (ԳՀԾ) ունեցող հաստատություններին՝ նրանց շնորհելով «Գենդերային հավասարության չեմպիոն» մրցանակը։

Նշված հաստատությունները կարող են լինել համալսարաններ, բարձրագույն ուսումնական հաստատություններ եւ այլ հետազոտական ​​կազմակերպություններ (պետական ​​կամ մասնավոր), որոնք գործում են ԵՄ անդամ պետությունում կամ «Հորիզոն Եվրոպա» ծրագրին ասոցացված երրորդ երկրում, ներառյալ Հայաստանը, Վրաստանը, Մոլդովան եւ Ուկրաինան։

Մրցանակը շնորհվում է 3 անվանակարգերում.

1. Կայուն գենդերային հավասարության չեմպիոններ. կազմակերպություններ, որոնք իրենց ԳՀԾ-ի իրականացման միջոցով կարող են ցուցադրել գործունեության զգալի եւ կայուն ցուցանիշ եւ բարձր մակարդակի ձեռքբերումներ։
2. Սկսնակ գենդերային հավասարության չեմպիոններ. կազմակերպություններ, որոնք վերջերս են ավարտել իրենց առաջին ԳՀԾ-ի իրականացումը եւ կարող են ցուցադրել դրա իրականացման միջոցով ձեռք բերված ամենամեծ առաջընթացը։
3. Ներառական գենդերային հավասարության չեմպիոններ. կազմակերպություններ, որոնք կարող են ցուցադրել ներառական ԳՀԾ-ի իրականացման միջոցով ստացված կոնկրետ արդյունքներ։ Ծրագիրը պետք է անդրադառնա գենդերի եւ առնվազն երկու այլ սոցիալական կատեգորիաների հատման կետերին, ինչպիսիք են ռասայական կամ էթնիկական ծագումը, սոցիալական ծագումը, սեռական կողմնորոշումը եւ գենդերային ինքնությունը կամ հաշմանդամությունը։

Արդյունքները պաշտոնապես կհայտարարվեն 2026 թվականին կայանալիք մրցանակաբաշխության ժամանակ: Յուրաքանչյուր հաղթող կստանա գավաթ եւ 100,000 եվրո մրցանակ:

Դիմորդները կարող են դիմել երեք անվանակարգերից միայն մեկին, իսկ նախորդ մրցույթների հաղթողները չեն կարող կրկին դիմել մեկ այլ անվանակարգի։

Դիմումների ընդունման վերջնաժամկետը հունիսի 18-ն է։

Իմացիր ավելին

Մամուլի հաղորդագրություն