დაფნე კარუანა გალიციას პრიზი ჟურნალისტიკაში განაცხადების მიღებას იწყებს

21 მაისს ევროპარლამენტმა კონკურსისთვის, დაფნე კარუანა გალიციას პრიზი ჟურნალისტიკაში, განაცხადების მიღება მეხუთედ გამოაცხადა. 

კონკურსი ყოველწლიურად აჯილდოებს გამორჩეულ ჟურნალისტურ ნამუშევრებს, რომლებიც ევროკავშირის ისეთ ფუნდამენტურ პრინციპებსა და ღირებულებებს იცავს, როგორიცაა ადამიანის ღირსება, თავისუფლება, დემოკრატია, თანასწორობა, კანონის უზენაესობა და ადამიანის უფლებები.

დაფნე კარუანა გალიცია მალტელი ჟურნალისტი, ბლოგერი და კორუფციის წინააღმდეგ მებრძოლი აქტივისტი იყო, რომელმაც მნიშვნელოვანი წვლილი შეიტანა კორუფციის, ფულის გათეთრების, ორგანიზებული დანაშაულის, მოქალაქეობის გაყიდვისა და „პანამის დოკუმენტებთან“ მალტის მთავრობის კავშირის გამოაშკარავებაში. მრავალწლიანი დევნისა და მუქარების შემდეგ, ის 2017 წლის 16 ოქტომბერს საკუთარ მანქანაში ააფეთქეს. 

„თავისუფალი მედია საუკეთესო ფარია დემოკრატიისთვის. ჟურნალისტებს უნდა ჰქონდეთ შესაძლებლობა, მუშაობდნენ ცენზურის, მუქარისა თუ შურისძიების შიშის გარეშე. ევროპარლამენტი ყოველთვის დაიცავს და მხარს დაუჭერს მედიისა და პრესის თავისუფლებას,“ — განაცხადა ევროპარლამენტის პრეზიდენტმა, რობერტა მეცოლამ.

კონკურსში განაცხადის შეტანა შეუძლიათ ნებისმიერი ეროვნების პროფესიონალ ჟურნალისტებსა და პროფესიონალი ჟურნალისტების გუნდებს. მათ უნდა წარადგინონ ანალიტიკური სიღრმისეული მასალა, რომელიც ევროკავშირის 27 წევრი სახელმწიფოდან ერთ-ერთი ქვეყნის მედიასაშუალების მიერ გამოქვეყნდა.

20,000 ევროს ოდენობის წლიური ჯილდო გამარჯვებულს 2025 წლის ოქტომბერს სტრასბურგში, ევროპარლამენტში გადაეცემა. 

განაცხადების შეტანის ბოლო ვადაა 2025 წლის 31 ივლისი. 

დამატებითი ინფორმაცია

პრესრელიზი 

სარეგისტრაციო ფორმა