Culture Moves Europe: გამოცხადდა კონკურსი ინდივიდუალური მობილობის ხელშესაწყობად

ევროკავშირის მიერ დაფინანსებულმა პროგრამამ, Culture Moves Europe („ევროპას კულტურა ამოძრავებს“) ოქტომბერში ახალი კონკურსისთვის განაცხადების მიღება დაიწყო. ევროკომისიამ ამ მიზნით დამატებით 25 მილიონი ევრო გამოყო, რომელიც 2028 წლამდე 7,000 ხელოვანსა და კულტურის სფეროს პროფესიონალს ფინანსურად დაეხმარება. პროგრამას გოეთეს ინსტიტუტი ახორციელებს. 

ინდივიდუალური მობილობისთვის განკუთვნილი გრანტების მიღება შეუძლიათ ხელოვანებსა და კულტურის სფეროს პროფესიონალებს, რომლებიც „შემოქმედებითი ევროპის“ ქვეყნებში ცხოვრობენ და სურთ, რომ თავიანთი პროექტები პროგრამის მონაწილე სხვა ქვეყანაში განახორციელონ. განმცხადებლები უნდა იყვნენ მინიმუმ 18 წლის და ხელოვნების სხვადასხვა მიმართულებით ნებისმიერი დონის გამოცდილების მქონე. 

საგრანტო სქემა, რომელიც შვიდ სექტორს მოიცავს, მიზნად ისახავს, გააფართოოს სახელოვნებო და კულტურული მობილობა ევროპასა და მეზობელ რეგიონებში. 

გრანტის მიღების მსურველებს განაცხადის წარდგენა შეუძლიათ ინდივიდუალურად ან მაქსიმუმ 5 ადამიანისგან შემდგარი ჯგუფის სახით. წარდგენილი პროექტი უნდა განხორციელდეს ერთ ქვეყანაში. ინდივიდუალური პროექტის ხანგრძლივობა უნდა იყოს 7-იდან 60 დღემდე, ხოლო ჯგუფური პროექტის – 7-იდან 21 დღემდე. 

გრანტით გათვალისწინებულია დღიური სახარჯავი თანხა (85 ევრო დღიურად პროექტის განხორციელების განმავლობაში), მგზავრობა (გამოითვლება ავტომატურად მანძილის მიხედვით), ეკო-მობილობის დანამატი (400 ევრო), ოჯახისთვის განკუთვნილი დანამატი (200 ევრო თითო შვილზე) და ვიზისთვის განკუთვნილი დანამატი (120 ევრო). საჭიროების შემთხვევაში ასევე გათვალისწინებულია ხელმისაწვდომობის უზრუნველყოფისთვის განკუთვნილი მხარდაჭერა. 

გრანტები გაიცემა ყოველთვიურად 2026 წლის 30 აპრილამდე.

კონკურსი ღიაა ხელოვანებისთვის საქართველოდან, მოლდოვიდან, სომხეთიდან და უკრაინიდან. 

წელსვე, 2025 წლის 15 დეკემბერს გამოცხადდება რეზიდენტების მასპინძლებისთვის განკუთვნილი კონკურსი. ხოლო მომდევნო კონკურსები 2028 წლამდე არის დაგეგმილი. 

დამატებითი ინფორმაცია

პრესრელიზი