Perform Europe-მა 42 პარტნიორობის პროექტი შეარჩია, რომელთა შორის საქართველოდან წარდგენილი ინიციატივებიც მოხვდა

ევროკავშირის მიერ დაფინანსებულმა პროგრამამ, Perform Europe,  42 პარტნიორობის პროექტს 2.1 მილიონი ევროს მოცულობის გრანტი გამოუყო. 

პროექტების ფარგლებში „შემოქმედებითი ევროპის“ პროგრამის წევრი ქვეყნების საშემსრულებლო ხელოვნების სექტორში მომუშავე 196 პარტნიორის 63 ნამუშევრის გასტროლები დაფინანსდება. 

„შერჩეული პროექტები აჩვენებს შემოქმედებითი ხელოვნების ძალას, გამოიწვიოს სოციალური ცვლილებები, ხელი შეუწყოს მრავალფეროვნებასა და ინკლუზიურობას, მიიტანოს ხელოვნების ნიმუშები ყველა სახის აუდიტორიამდე და შეეჭიდოს აქტუალურ გლობალურ პრობლემებს“ – ნათქვამია „შემოქმედებითი ევროპის“ პრესრელიზში. 

ამასთან, მთლიანი დაფინანსების 13% მოხმარდება პროექტებს, რომლებიც უკრაინულ საშემსრულებლო ხელოვნების სექტორს უჭერს მხარს. 

შერჩეულ პროექტებს შორის ერთ-ერთია საქართველოს, სომხეთისა და უკრაინის საერთო ინიციატივა. რადგან ამ ქვეყნების ისტორიული კონტექსტები ერთმანეთს სიღრმისეულად ეხმიანება, ეს პროექტი 60,000 ევროს მოცულობის გრანტს იმისთვის მიიღებს, რომ საქართველოში, სომხეთსა და უკრაინაში მონაწილეობითი პერფორმანსი „სათბური“ წარადგინოს. 

„’სათბური’ სამხედრო კონფლიქტის შედეგად იძულებით გადაადგილების საკითხს ეხება და აუდიტორიას სცენაზე დროებითი თავშესაფრის ასაშენებლად იწვევს,“ – ვკითხულობთ პროექტის აღწერაში, – „მიგრაციის საზიარო გამოცდილება, რომელიც მთიანი ყარაბაღის, რუსეთ-საქართველოსა და რუსეთ-უკრაინის ომების შედეგია, ადგილობრივი აუდიტორიის ჩართვისა და ეკომიგრაციისა და კლიმატის ცვლილების უფრო ფართო პრობლემების გააზრების შესაძლებლობას იძლევა“.

კიდევ ერთი პროექტი მხარს დაუჭერს მარიუპოლში ჩატარებულ ერთ-ერთ ბოლო პერფორმანსს, „ალასკა – ბედნიერებისკენ სწრაფვა & მოძალადე სამყარო“, რომელიც რუსეთის სრულმასშტაბიან შემოჭრამდე ოთხი თვით ადრე დაიწერა. ნამუშევარი ქალაქის ახალგაზრდებს თვითგამოხატვის შესაძლებლობას აძლევს მას მერე, რაც მათი თეატრი სრულად განადგურდა. პერფორმანსი გასტროლებით ეწვევა პოლონეთს, უნგრეთსა და ბოსნიას და მისი შემსრულებლები ადგილობრივ ახალგაზრდა მსახიობებსა და ამ ქვეყნებში მცხოვრებ უკრაინელებს შეხვდებიან. 

დამატებითი ინფორმაცია

პრესრელიზი 

შერჩეული პროექტების სია