ევროპის განათლების ფონდის მწვანე უნარების კონკურსი 2023: ფინალისტთა შორის საქართველოს წარმომადგენელიც მოხვდა

ევროპის განათლების ფონდმა (ETF) მწვანე უნარების 2023 წლის კონკურსის ათი ფინალისტი გამოავლინა. ფინალისტები 60-ზე მეტი ქვეყნიდან შეტანილ 600-მდე განაცხადს შორის შეარჩიეს და მათში საქართველოს წარმომადგენელიც მოხვდა.

კონკურსი ავლენს ინიციატივებს, რომლებმაც მსოფლიოს მასშტაბით მწვანე უნარების პოპულარიზაციისა და განვითარების მიმართულებით ინოვაციური მიდგომები და განსაკუთრებული ძალისხმევა გამოიჩინეს.

აღმოსავლეთ პარტნიორობის ქვეყნებიდან ფინალისტებს შორის სამი კანდიდატი მოხვდა.

საქართველოს წარმომადგენელი ფინალისტი, კონსტრუქტ2 ზესტაფონში მდებარე სამშენებლო კოლეჯია, რომელმაც თაბაშირ-მუყაოს ფილებით სამონტაჟო სამუშაოების შესრულებაზე ქვეყანაში პირველი კურსი აამოქმედა. დღეისათვის კოლეჯში, რომელიც დაინტერესებულ პირებს საქართველოს კერძო სექტორის მოთხოვნების შესაბამის პროფესიულ პროგრამებს სთავაზობს, ტრენინგი 200 სტუდენტს აქვს გავლილი.

სომხეთის წარმომადგენელი ფინალისტი, TUMO შემოქმედებით ტექნოლოგიების ცენტრია. ის ქმნის „ნივთების ინტერნეტით“ (IoT) დაკავშირებულ მეტეოროლოგიური სადგურების ქსელს, რაც ახალგაზრდა პროფესიონალებს კლიმატის ცვლილების მონიტორინგში საკუთარი წვლილის შეტანის საშუალებას აძლევს. 

უკრაინის წარმომადგენელი ფინალისტი, ტარას შევჩენკოს სახელობის ეროვნული უნივერსიტეტი სტუდენტებს ეკოლოგიურ ეკონომიკაზე, მწვანე ბიზნესზე და გარემოს მართვაზე ორიენტირებულ კურსებსა და დასაქმების შესაძლებლობებს სთავაზობს. უნივერსიტეტი უკრაინის მწვანე გარდაქმნაზე ზრუნვას რუსეთის აგრესიის მიუხედავად აგრძელებს. 

მწვანე უნარების კონკურსის გამარჯვებულები გამოვლინდებიან ღია კენჭისყრით, რომელიც გაგრძელდება 29 სექტემბრამდე (23:59 CEST). მათი ვინაობა 2023 წლის ბოლოს გამართულ დაჯილდოების ცერემონიაზე გახდება ცნობილი.

დამატებითი ინფორმაცია

პრესრელიზი