ევროკავშირის მიერ მხარდაჭერილი კვლევა შრომითი მიგრანტი ქალების სოციალურ-ეკონომიკურ საჭიროებებს ავლენს

22 ნოემბერს ევროკავშირმა, შვედეთმა, გაეროს განვითარების პროგრამამ და ორგანიზაციამ, „ქალები საერთო მომავლისათვის  — საქართველო“ (WECF-Georgia), გამოაქვეყნეს კვლევა, რომლის მიზანიც შრომითი მიგრანტი ქალების საქართველოში დაბრუნებისა და რეინტეგრაციის მხარდაჭერაა.

ღონისძიებას საქართველოს მთავრობის, სამოქალაქო საზოგადოებისა და საერთაშორისო ორგანიზაციების წარმომადგენლები დაესწრნენ.

კვლევის მიგნებები შრომით მიგრანტ ქალებთან ჩატარებულ 22 ინტერვიუს და  საქართველოს კანონმდებლობის, პოლიტიკისა და სახელმწიფო პროგრამების სიღრმისეულ ანალიზს ეყრდნობა. 

კვლევის თანახმად, ბოლო წლებში საქართველომ მნიშვნელოვანი ნაბიჯები გადადგა მიგრაციის მართვის სისტემის განვითარების მიმართულებით, თუმცა მიგრაციის ფემინიზაცია მეტ ყურადღებას საჭიროებს.

შრომითი მიგრანტი ქალები ხშირად ვერ ახერხებენ ფინანსური კაპიტალის დაგროვებას. ისინი აწყდებიან ისეთ დაბრკოლებებს, როგორიცაა უმუშევრობა, პროფესიული კვალიფიკაციის დაკარგვა, შეზღუდული წვდომა მომსახურების ინფრასტრუქტურასთან და სოციალური დაცვის სისტემის ხარვეზები — იქნება ეს დაბალი პენსიები თუ ძვირადღირებული ჯანდაცვა. დამატებითი დაბრკოლებებია უმუშევრობის შემწეობის არარსებობა, საბინაო გამოწვევები და მაღალი საპროცენტო განაკვეთები კომერციულ სესხებზე.

კვლევის რეკომენდაციების მიხედვით, საქართველოს მთავრობამ და სამოქალაქო საზოგადოებამ მიზნობრივი პროგრამებისა და პოლიტიკის საშუალებით უნდა დაუჭირონ მხარი შრომითი მიგრანტი ქალების ქვეყანაში ღირსეულ დაბრუნებას. 

დამატებითი ინფორმაცია

პრესრელიზი