უკრაინის ომის შემდგომი აღდგენის მხარდასაჭერად ევროკავშირი სოლიდარობის ნდობის ფონდს შექმნის
24 მარტს ევროპის კავშირის საბჭომ აშშ-ის პრეზიდენტთან, ჯო ბაიდენთან ტრანსატლანტიკური თანამშრომლობის საკითხები უკრაინის წინააღმდეგ რუსეთის სამხედრო აგრესიის კონტექსტში განიხილა.
საბჭომ რუსეთისგან მოითხოვა, დაუყოვნებლივ შეწყვიტოს უკრაინაში სამხედრო აგრესია და ომის ისეთი დანაშაულების ჩადენა, როგორიც სამოქალაქო ობიექტების დაბომბვაა. მან რუსეთს ალყაში მოქცეული მშვიდობიანი მოსახლეობისთვის უსაფრთხო ჰუმანიტარული დერეფნების უზრუნველყოფაც მოსთხოვა.
ევროკავშირი აცხადებს, რომ ის გააგრძელებს უკრაინის კოორდინირებულ პოლიტიკურ, ფინანსურ, მატერიალურ და ჰუმანიტარულ დახმარებას. ის, ამასთან, განაგრძობს მუშაობას რუსეთის და ბელარუსის წინააღმდეგ მომდევნო მკაცრი, კოორდინირებული სანქციების სწრაფად მიღებაზე, რისი მიზანიც ომის დასრულებაა. ევროპულმა საბჭომ მოუწოდა ყველა ქვეყანას, შეუერთდნენ ამ სანქციებს და დასძინა, რომ „უნდა აღიკვეთოს სანქციებისთვის თავის არიდების ან რუსეთის რაიმე სხვა გზით დახმარების ყველა მცდელობა“.
ევროპულმა საბჭომ მოუწოდა ევროკავშირის სახელმწიფოებს, კიდევ უფრო გააძლიერონ უკრაინელი ლტოლვილების დახმარებისთვის გაწეული ძალისხმევა. მან ასევე სთხოვა ევროკომისიას, განახორციელოს ყოველგვარი საჭირო ინიციატივა იმ ქვეყნების მხარდასაჭერად, რომლებიც ლტოლვილებს იღებენ.
ევროკავშირი აღნიშნავს, რომ რუსეთის სამხედრო აგრესიის შეწყვეტისთანავე ის იღებს ვალდებულებას, მხარი დაუჭიროს უკრაინის მთავრობას დემოკრატიული უკრაინის დაუყოვნებელი აღდგენის საქმეში. ამ მიზნით ის უკრაინის სოლიდარობის ნდობის ფონდს ქმნის. ევროპული საბჭო თავის საერთაშორისო პარტნიორებსაც სთხოვს ამ პროცესში ჩართვას. ევროკომისიას კი საბჭომ მოუწოდა, განაგრძოს უკრაინისთვის ტექნიკური დახმარების გაწევა იმისათვის, რომ ქვეყანამ საჭირო რეფორმების გატარება შეძლოს.
გარდა ამისა, ევროპულმა საბჭომ წამოაყენა საერთაშორისო კონფერენციის უახლოეს მომავალში ორგანიზების წინადადება. კონფერენციის მიზანი უკრაინის სოლიდარობის ნდობის ფონდის დაფინანსებისთვის თანხების მოზიდვა იქნება.
საბჭომ უკრაინის და მოლდოვის ენერგოქსელების ევროკავშირის ქსელთან სინქრონიზაციას „ღირსშესანიშნავი მიღწევა“ უწოდა და განაცხადა, რომ ევროკავშირს აღებული აქვს ვალდებულება, უზრუნველყოს უკრაინისთვის ელექტროენერგიის და გაზის უწყვეტი მიწოდება.
დამატებითი ინფორმაცია
ყველაზე წაკითხული
თემაზე
ევროკავშირი, გაერო და ავსტრია საქართველოში ჰაერის ხარისხის გასაუმჯობესებლად ახალ პროექტს იწყებენ
ევროკავშირი უცხოური გავლენის შესახებ კანონს „ევროკავშირის ნორმებთან და ღირებულებებთან შეუთავსებელს“ უწოდებს
არა, დრო რუსეთის მხარეს არაა: ბორელი ომისა და ევროკავშირის სანქციების შედეგად რუსეთის ეკონომიკის დასუსტებას აღწერს
ევროკავშირის პოლიტიკის და უსაფრთხოების კომიტეტის წევრები საქართველოს სამუშაო ვიზიტით ეწვივნენ
ევროკავშირი და გერმანია აჭარაში წყალმომარაგებისა და წყალარინების სისტემების განახლებას უჭერენ მხარს
ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,
