ზოი პორტერი
ახალი ამბების დამოუკიდებელი კონსულტანტი, ლონდონი, გაერთიანებული სამეფო
ზოის აქვს 30 წლიანი გამოცდილება ახალი ამბების ინდუსტრიაში, ის ბოლო წლებში მუშაობდა BBC-ში ხელმძღვანელ პოზიციებზე. როგორც უფროსი რედაქტორი, იგი ხელმძღვანელობდა BBC-ის საერთაშორისო საინფორმაციო წარმომადგენლობას სინგაპურსა და ვაშინგტონში, ასევე ხელმძღვანელობდა BBC-ის მთავარ დილის სატელევიზიო პროგრამას დიდ ბრიტანეთში. იგი მუშაობდა ციფრულ განვითარებაზე საერთაშორისო ახალი ამბების სერვისებში და ხელმძღვანელობდა BBC-ის პირველი მოკლე ფორმის ახალი ამბების ბიულეტენების გაშვებას მობილური მოწყობილობებისთვის. მას ასევე აქვს გამოცდილება ცვლილებების მენეჯმენტში, BBC-ის მასშტაბით პროექტების განვითარების ხელმძღვანელობაში. როგორც მედია კონსულტანტი, ის მუშაობს საინფორმაციო ორგანიზაციებთან, რომლებიც ციფრულ ტექნოლოგიებზე გადადიან და ეხმარება სარედაქციო რეორგანიზაციის პროცესებში. კარიერის განმავლობაში მუშაობდა რეპორტიორად და ტელე წამყვანად, ასევე ამზადებდა და გადასცემდა ახალი ამბებს ადგილიდან და პირდაპირ ეთერში სტუდიიდან.
ნატალია მუმლაძე
ახალი ამბების დირექტორი „პალიტრა მედია“ თბილისი, საქართველო
ნატალია ათ წელზე მეტია ხელმძღვანელობს საქართველოში ყველაზე დიდი მედია სახლის “პალიტრა მედიის” მულტიმედია ნიუსრუმს. მისი ხელმძღვანელობის პირობებში, ნიუსრუმი ტრანსპფორმირდა მულტი პლატფორმულ და მულტი ფორმატულ მედიად, ნიშურ ვებსაიტებად ქვეყანაში ყველაზე მაღალი აუდიტორიით. მისი მთავარი მიზანი იყო თანამედროვე და კომფორტული სამუშაო სივრცის შექმნა სხვადასხვა მედია გუნდის თანამშრომლობისთვის და ორგანიზაციის ფინანსური მდგრადობის შენარჩუნება. ნატალიას აქვს ტელეპროდიუსერად და ჟურნალისტად მუშაობის გამოცდილება. ეს ეხმარება მას უკეთ გაიაზროს მედია გუნდების საჭიროებები და ხარისხიანი და ინოვაციური ჟურნალისტიკის მნიშვნელობა.
2. ახალი ამბების განყოფილების სტრუქტურასთან დაკავშირებული სახელმძღვანელო პრინციპები
აქ წარმოდგენილი ორგანიზაციული სტრუქტურის ნიმუშები დაეხმარება იმ ხელმძღვანელებს, რომლებსაც სურთ ახალი ამბების განყოფილების გარდაქმნა მულტიმედიურ ფორმატის მაუწყებლობად.
ეს პრინციპები წარმოადგენს საილუსტრაციო სახელმძღვანელო ინსტრუქციებს, რომლებიც შეიძლება ადაპტირდეს და ახალი ამბების განყოფილების ხელმძღვანელებს საშუალება მისცეს, შეიმუშაონ საკუთარი რესურსებისა და პრიორიტეტების შესაბამისი სტრუქტურა.
ორგანიზაციული სქემები
- დიდი მულტიმედიური რედაქციის (ახალი ამბების განყოფილების) ნიმუში
- გამარტივებული ნიმუში უფრო მცირე მულტიმედიური რედაქციისთვის (ახალი ამბების განყოფილებისთვის)
განმარტება
დიდი საინფორმაციო ორგანიზაციისთვის განკუთვნილ ამ მოდელში სოციალურ / ონლაინმედიას, ტელევიზიასა და რადიოს ცალ-ცალკე რედაქტორები ჰყავთ. სხვადასხვა სამუშაო პოზიციის ქვემოთ მოცემული აღწერილობები დეტალურ ინფორმაციას გვაწვდის ცალკეული თანამდებობების შესახებ. მაგალითად, მულტიმედია ჟურნალისტს, რედაქტორის ზედამხედველობით, შეუძლია შექმნას ყველა პლატფორმისთვის შესაბამისი კონტენტი; ასევე, შეიძლება ორმაგი ფუნქციის შეთავაზება [დასაქმებულისთვის] – მაგალითად, ოპერატორისა და ჟურნალისტის როლების შეთავსება.
ვებგვერდებს აქვთ სპეციალიზებული განყოფილებები – მაგალითად, ახალი ამბები, სპორტი, ანალიზი, ქალთა გვერდი, ცხოვრების სტილი და ვიდეორგოლები (შეიძლება ადამიანების ისტორიები). ზოგიერთი ამგვარი კონტენტი შესაფერისია სოციალური მედიისა და სხვა პლატფორმებისთვისაც.
ზოგიერთ რედაქციას ჰყავს ახალი ამბების (საინფორმაციო) სააგენტოს გუნდი, რომელიც მულტიმედია ჟურნალისტებითაა დაკომპლექტებული. ისინი წერენ სიუჟეტებს და ტექსტებს, რომლებსაც შეისყიდის სხვა მედიაკომპანია. ამ ჟურნალისტებმა შეიძლება სხვა მიმართულებითაც, მაგალითად, რადიოპროდუქტზეც იმუშაონ.
მონაცემთა ანალიტიკოსი პასუხისმგებელია სხვადასხვა პლატფორმაზე ტრაფიკისა თუ აუდიტორიის მეთვალყურეობაზე და [შედეგებს] აცნობებს ახალი ამბების რედაქტორებს, რათა მათ იცოდნენ, რომელ ამბებს კითხულობს და ნახულობს აუდიტორია ყველაზე მეტად. ეს ინფორმაცია შეიძლება მიეწოდოს ახალი ამბების დეპარტამენტის ყველა მიმართულებას და ხელი შეუწყოს სარედაქციო გადაწყვეტილებებს ისეთ ცალკეულ პლატფორმებზე, როგორიცაა ტელევიზია.
რედაქციას შეიძლება ჰყავდეს ბუნებრივი კონტენტის მწარმოებლების / მწერლების სპეციალური დანაყოფი, რომლებიც მუშაობენ როგორც სარეკლამო გუნდთან ისე ახალი ამბების რედაქტორებთან ინტერნეტისთვის ან სოციალური მედიისთვის დაფინანსებული კონტენტის შექმნაზე.
დიდ მედიაორგანიზაციას შეიძლება ჰყავდეს სარეკლამო, კადრებისა და ტექნიკური გუნდები, რომლებიც მთელ კომპანიას მოემსახურება.
ტექნიკური გუნდი იმუშავებს ბიზნესის ყველა სფეროზე, მათ შორის ყოველდღიურ პროდუქციაზე, დაგეგმვასა და ინოვაციაზე, ქსელის განახლებაზე და სხვა [მსგავსი ასპექტების] განვითარებაზე.
კადრების (HR) პასუხისმგებლობაა მენეჯმენტის მხარდაჭერა პერსონალის დაქირავებისა და ტრენინგის საშუალებით, ასევე, თანამშრომლებისთვის ანაზღაურების, კონტრაქტებისა და პოლიტიკის (წესებისა და პრინციპების) ორგანიზება, რაც მოიცავს, მაგალითად, დეკრეტული შვებულების ანაზღაურებასა და კარიერულ განვითარებას. მათ შეუძლიათ რედაქტორებთან თანამშრომლობა სამუშაო ადგილას თანასწორობის გაუმჯობესების მიზნით.
ზოგიერთმა დიდმა ორგანიზაციამ შეიძლება განიხილოს შიდა ტრენინგის პროგრამები ახალი ნიჭიერი კადრის მოძიების მიზნით. მაგ., პალიტრა მედიას სოციალური მედიის მენეჯერების სტაჟირების 12-თვიანი პროგრამა: ზოგიერთი სტაჟიორი ჟურნალისტად განაგრძობს მუშაობას.
კომუნიკაცია მნიშვნელოვანი გასათვალისწინებელი ასპექტია და ზოგიერთმა დიდმა ორგანიზაციამ შეიძლება დაიქირავოს კომუნიკაციის სპეციალისტი. მეორე მხრივ, მენეჯერსაც შეუძლია იმის უზრუნველყოფა, რომ მნიშვნელოვანი ინფორმაცია მრავალი სხვადასხვა არხით მიეწოდოს პერსონალის ყველა წევრს. პერსონალს, ასევე, უნდა შეეძლოს ადვილად მიაწოდოს მენეჯერებს უკუკავშირი და მიმართოს კონკრეტულ პირს სამუშაოზე წარმოქმნილი ნებისმიერი პრობლემის თაობაზე.
განმარტება
ეს მოდელი მოიაზრებს მულტიმედია ჟურნალისტების გაცილებით მცირე გუნდს, რომლებიც როგორც სოციალური მედიის, ისე ვებპროდუქტზე მუშაობენ. რედაქციას (მოცულობის მიხედვით) შეიძლება დასჭირდეს ვებგვერდის რამდენიმე რედაქტორი, თუმცა ახალი ამბების ერთ რედაქტორს შეუძლია კონტენტის მეთვალყურეობა და ჟურნალისტების მართვა.
მცირე რედაქციას მაინც ჰყავს მონაცემთა ანალიტიკოსი ტრაფიკის მონიტორინგისთვის, ასევე, შეიძლება ჰქონდეს პატარა საინფორმაციო სააგენტო და ე.წ. ნატივური კონტენტის მწერალი შემოსავლების ზრდის მიზნით.
[ასეთ რედაქციას] ასევე სჭირდება კადრების (HR) მენეჯერი, ტექნიკური მხარდაჭერის სპეციალისტი და რეკლამის პერსონალი, რომელიც ჟურნალისტებთან ითანამშრომლებს. სხვაგვარად კადრების მოვალეობა (დაქირავება, კონტრაქტები და პერსონალის განვითარება) უნდა შეითავსოს ახალი ამბების მენეჯერმა.
ვიდეომასალისა და ტექსტის გაზიარება ორგანიზების საკვანძო პრინციპია; ინფორმაცია ხელმისაწვდომი უნდა იყოს ყველა ჟურნალისტისა და რედაქტორისთვის, სიუჟეტები კი სხვადასხვა პლატფორმის სპეციფიკას ერგებოდეს, რაც ხელს შეუწყობს ზემოქმედებისა და დაფარვის დონეების მაქსიმალურად გაუმჯობესებას.
სამუშაოს აღწერილობის ნიმუშები
ამ ნაწილში წარმოდგენილია ფუნქცია-მოვალეობების რამდენიმე ნიმუში, რომლებიც ცხადყოფს, როგორ უნდა დაიწეროს სამუშაოს აღწერილობა და განმარტავს, რას შეიძლება მოიცავდეს თითოეული პოზიცია. თითოეული მათგანი შეიძლება მოარგოთ თქვენი რედაქციის საჭიროებებს.
სასურველია, გქონდეთ სამუშაოს აღწერილობისა და ხელშეკრულებების მზა ნიმუშები პერსონალის დაქირავების ან დასაქმებულის პოზიციის ცვლილების შემთხვევებისთვის, რათა დამსაქმებელისა და დასაქმებულისთვისაც ცხადი იყოს, რას უნდა ელოდნენ.
ასევე, წინასწარ განსაზღვრულ საკვალიფიკაციო მოთხოვნებთან კანდიდატის შესაბამისობის უზრუნველყოფა საშუალებას მოგცემთ, გამოცხადებულ პოზიციაზე საუკეთესო კადრი შეარჩიოთ.
- ნიმუშები მოიცავს სამუშაოს მოკლე აღწერილობას, პოზიციისთვის საჭირო უნარებსა და შეხსენებას, რომ მიუთითოთ სამუშაო საათები და სახელფასო დიაპაზონი.
- ქვემოთ მოცემული ნიმუშები განკუთვნილია უფროსი და უმცროსი პერსონალისთვის, როგორებიცაა მულტიმედიური პროდუქტის დამკვეთი რედაქტორი, მულტიმედია რეპორტიორი, სოციალური მედიის პროდიუსერი და მონაცემთა ანალიზის პროდიუსერი.
- ასევე დართულია რამდენიმე არაჟურნალისტური, მარკეტინგისა და რეკლამირების პოზიციები, რომლებიც ახალი ამბების განყოფილების პარალელურად ფუნქციონირებს.
- თითოეული პოზიციის აღწერილობაში უნდა იყოს მითითებული თქვენი კომპანიის სარედაქციო პრინციპები (სახელმძღვანელო ინსტრუქციები). ესენია იმ სახელმძღვანელო ინსტრუქციების ერთიანობა, რომლებსაც წერს მენეჯმენტი და აწვდის მთელ პერსონალს, რათა საშუალება მისცეს დასაქმებულებს, ხელი შეუწყონ დასახული მიზნების მიღწევას. ეს პრინციპები განსაზღვრავს თქვენი ორგანიზაციის ახალი ამბების განყოფილების ღირებულებებს და მათი განახლება უნდა მოხდეს მედიის სფეროში მიმდინარე ცვლილებების შესაბამისად (მაგ., სოციალური მედიის სახელმძღვანელო პრინციპები, დიდი ალბათობით, შეიცვლება ახალი ტექნოლოგიის გამოჩენისას).
შემთხვევის ანალიზი – „პალიტრა მედიას“ მულტიმედიური რედაქცია
„პალიტრა მედია“ (თბილისი, საქართველო) წარმატებული მედიაორგანიზაციაა, რომელსაც აქვს გაზეთი („პრინტ მედია“), ასევე, სატელევიზიო და რადიოსადგურები, ვებგვერდები და სოციალური მედიაგვერდები (ძირითადად Facebook).
ორგანიზაციული სქემა აჩვენებს, როგორ შეძლო ახალი ამბების ამ ორგანიზაციამ ინტერნეტგუნდის დივერსიფიცირება სოციალური მედიისა და ციფრული ჟურნალისტიკის მიმართულებებით.
ორგანიზაციას ჰყავს მულტიმედია ჟურნალისტები, რომლებიც სხვადასხვა პლატფორმაზე მუშაობენ.
- რას ველოდები ჩემი დამსაქმებლისგან და რატომ ვარჩიე აქ მუშაობა – მულტიმედია ჟურნალისტი განმარტავს, თუ რას ელის სამუშაოსგან და რატომ რჩება ამ დამსაქმებელთან კონკურენტულ ბაზარზე.
(სალომე აბულაშვილი, მულტიმედია ჟურნალისტი, თბილისი, საქართველო) - როგორ დავიქირავოთ შესაფერისი პერსონალი მულტიმედიურ ეპოქაში – ახალი ამბების განყოფილების აღმასრულებელი რედაქტორი მოგვითხრობს, როგორი პოლიტიკის დანერგვაა საჭირო იმისათვის, რომ საუკეთესო პერსონალი აიყვანოთ და როგორ უნდა დაიქირავოთ შესაფერისი ხალხი ციფრულ ეპოქაში.
(ლიზ გიბონსი, ახალი ამბების აღმასრულებელი რედაქტორი, „ბი-ბი-სის“ მსოფლიო მაუწყებლობა (BBC World Service), ლონდონი, გაერთიანებული სამეფო) - როგორ წარმოგიდგენიათ მომდევნო 5 წელი ახალი ამბების სფეროსთვის? წამყვანი საერთაშორისო საინფორმაციო ორგანიზაციის ერთ-ერთი ხელმძღვანელი მოგვითხრობს, რა მნიშვნელოვანი ცვლილებები მიმდინარეობს ახალი ამბების სფეროში და რაზე ამახვილებენ ყურადღებას ხელმძღვანელები.
(დომინიკ ბოლი, ახალი ამბების კონტენტის დირექტორის მოადგილე, „ბი-ბი-სი ნიუსი“ (BBC News), ლონდონი, გაერთიანებული სამეფო) - როგორ მივიღოთ შემოსავალი ჟურნალისტური საქმიანობისგან ?.. ახალი ამბების უფროსი რედაქტორი საუბრობს, თუ როგორ შეიძლება ჟურნალისტური საქმიანობის მონეტიზაციასა და სარედაქციო კონტროლს შორის წინააღმდეგობის მართვა.
(ფილიპს ლასტოვისკისი, მთავარი რედაქტორი, ვებგვერდი „დელფი“ (Delfi), რიგა, ლატვია) - როგორ უნდა იმუშაოს გენდერულმა თანასწორობამ კომპანიისთვის? პოლიტიკის უფროსი მკვლევარი განგვიმარტავს, როგორ უნდა გააკეთონ კომპანიებმა მეტი დეკრეტის უფლებისთვის და რატომ იქნება ეს სასარგებლო როგორც თქვენთვის, ისე დასაქმებულებისთვის.
(დავით კეშელავა – ISET-ის პოლიტიკის ინსტიტუტის უფროსი მკვლევარი) - მულტიმედიური ახალი ამბების განყოფილების მართვასთან დაკავშირებული რჩევები უფროსი მენეჯმენტისთვის – ახალი ამბების განყოფილების აღმასრულებელი დირექტორი გვიზიარებს მულტიმედიურ ფორმატზე გადასვლისა და ახალი ამბების განყოფილების მართვის გამოცდილებას.
(ნატალია მუმლაძე, „პალიტრა მულტიმედიას“ ახალი ამბების განყოფილების მენეჯერი, თბილისი, საქართველო)
ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,
