ევროკავშირის საგარეო საქმეთა მინისტრების დელეგაცია ირაკლი ღარიბაშვილს შეხვდა

26 ივნისს ავსტრიის, ლიეტუვის და რუმინეთის საგარეო საქმეთა მინისტრებმა აზერბაიჯანში, საქართველოსა და სომხეთში საკუთარი ვიზიტის შედეგები შეაჯამეს. აღნიშნული ვიზიტი სამხრეთ კავკასიაში ევროკავშირის უმაღლესი წარმომადგენლის, ჯოზეფ ბორელის მანდატით 25-26 ივნისს განხორციელდა.

ევროპისა და საერთაშორისო საკითხებში ავსტრიის ფედერალური მინისტრი ალექსანდრ შალენბერგი, ლიეტუვის საგარეო საქმეთა მინისტრი გაბრიელიუს ლანდსბერგისი და რუმინეთის საგარეო საქმეთა მინისტრი ბოგდან აურესკუ სამხრეთ ოსეთთან ადმინისტრაციული სასაზღვრო ხაზის მონაკვეთებს საქართველოში ევროკავშირის სადამკვირვებლო მისიის თანხლებით ეწვივნენ. ამის შემდეგ ისინი თბილისში საქართველოს პრემიერ-მინისტრს, ირაკლი ღარიბაშვილს შეხვდნენ. 

ღარიბაშვილის თქმით, ეს მისია იმის დადასტურებაა, რომ ევროკავშირი მხარს უჭერს მშვიდობას და უსაფრთხოებას სამხრეთ კავკასიის რეგიონის ქვეყნებში. ავსტრიის, ლიეტუვის და რუმინეთის საგარეო საქმეთა მინისტრებმა მადლობა გადაუხადეს საქართველოს პრემიერ-მინისტრს სომხეთსა და აზერბაიჯანს შორის წარმატებით ჩატარებული მედიაციისთვის. ამ მოლაპარაკებათა შედეგად სომხეთის 15 მოქალაქე გათავისუფლდა, ხოლო აზერბაიჯანულ მხარეს გადაეცა მნიშვნელოვანი მასალა დანაღმული ტერიტორიების შესახებ.

პრემიერ-მინისტრი ევროკავშირის საგარეო საქმეთა მინისტრებს საქართველოს ოკუპირებული ტერიტორიების და კონფლიქტის მოგვარების პროცესში ევროკავშირის შემდგომი ჩართულობის მნიშვნელობის შესახებ ესაუბრა. გარდა ამისა, შეხვედრაზე განიხილეს ის ძალისხმევა, რომელიც უკანონოდ დაკავებული საქართველოს მოქალაქეების, ზაზა გახელაძის და ირაკლი ბებუას გასათავისუფლებლადაა საჭირო.

დამატებითი ინფორმაცია

პრესრელიზი