EBRD-ის თქმით, უკრაინაში ომი გლობალური ეკონომიკური ზრდის ტემპს მნიშვნელოვნად შეანელებს

ევროპის რეკონსტრუქციისა და განვითარების ბანკის (EBRD) მიერ ახლახან ჩატარებული კვლევის დასკვნების მიხედვით,  უკრაინაში ომი კონფლიქტის ტერიტორიიდან დაშორებულ ქვეყნებზეც მძიმე გავლენას მოახდენს.

ომის დაწყების შემდეგ ბანკის მიერ გამოქვეყნებული პირველი ეკონომიკური კვლევის მიხედვით, იმ რეგიონში, რომელშიც EBRD ოპერირებს, ზრდის პროგნოზი 2022 წლისთვის ნახევარზე მეტით — 1.7 პროცენტამდეა შემცირებული. ეს მაჩვენებელი მის წინანდელ პროგნოზზე 2.5%-ით ნაკლებია. იმავე პროგნოზის მიხედვით, 2023 წელს ბანკის ოპერირების რეგიონებში 5%-იანი ზრდაა მოსალოდნელი.

EBRD ომის გავლენას აღწერს როგორც „უდიდეს კრიზისს მიწოდების სფეროში, რომლის მსგავსი 1970-იანი წლების დასაწყისის შემდეგ აღარ ყოფილა“. მისი გაანგარიშებით, ფართო მოხმარების ისეთ პროდუქტებზე ფასების ზრდა, როგორიცაა სურსათი, ნავთობი, გაზი და ლითონები, სერიოზულ გავლენას მოახდენს სახელმწიფოებზე, რაც განსაკუთრებით დაბალშემოსავლიან ქვეყნებზე აისახება. EBRD აღნიშნავს, რომ ისეთი პროდუქტების მიწოდებაში, როგორიცაა ხორბალი, სიმინდი, სასუქები, ტიტანი და ნიკელი, რუსეთის და უკრაინის წილი არაპროპორციულად დიდია. 

მიუხედავად იმისა, რომ ზუსტი პროგნოზების გაკეთება შეუძლებელია, უკვე გადაჭრით შეიძლება იმის თქმა, რომ ეს მდგომარეობა მრავალ ქვეყანას მძიმე შედეგებს მოუტანს. მაგალითად, EBRD ვარაუდობს, რომ უკრაინის მთლიანი შიდა პროდუქტი წელს 3.5%-იანი ზრდის ნაცვლად 20%-ით შემცირდება, ხოლო რუსეთის — 3%-იანი ზრდის ნაცვლად 10%-ით იკლებს.

გარდა ამისა, EBRD-ის პროგნოზის მიხედვით, ბაზრებზე გეოპოლიტიკური რისკებისადმი სიფრთხილე კავკასიის და ცენტრალური აზიის ვალუტის კურსზე იმოქმედებს და, სხვა ქვეყნებთან ერთად, საქართველოს ტურიზმსაც მნიშვნელოვნად აზარალებს. 

იმის გათვალისწინებით, რომ რუსეთის მიმართ დაწესებული სანქციები გარკვეული პერიოდი მაინც გაგრძელდება, კვლევის ანგარიშის მიხედვით, 2023 წელს რუსეთის ეკონომიკა სტაგნაციაში აღმოჩნდება. ეს, თავის მხრივ, აღმოსავლეთ ევროპის, კავკასიისა და ცენტრალური აზიის იმ ქვეყნებზე მოახდენს უარყოფით გავლენას, რომლებიც რუსეთის მეზობლად მდებარეობენ.

მოვლენების სწრაფი განვითარების გათვალისწინებით, EBRD მომდევნო პროგნოზის გაკეთებას მომავალი რამდენიმე თვის განმავლობაში გეგმავს.

დამატებითი ინფორმაცია

პრესრელიზი

EBRD მოსკოვსა და მინსკში ოფისებს ხურავს

EBRD უკრაინაში მიმდინარე ომის საპასუხოდ 2 მილიარდი ევროს ოდენობის აღდგენის პაკეტს გასცემს