ՎԶԵԲ-ը Ինեկոբանկի միջոցով աջակցում է հայաստանյան փոքր բիզնեսներին

Վերակառուցման եւ զարգացման եվրոպական բանկը (ՎԶԵԲ) դեկտեմբերի 11-ին հայտարարեց Հայաստանի առաջատար ֆինանսական հաստատություններից մեկին՝ «Ինեկոբանկ»-ին 97 միլիոն եվրոյի նոր ֆինանսական փաթեթ տրամադրելու մասին։

Ֆինանսական փաթեթի հիմնական մասը՝ 90 միլիոն եվրոն, վարկային միջոցներ են, որոնք Ինեկոբանկը տրամադրելու է մասնավոր հատվածի հաճախորդներին։ Այս ֆինանսավորումը կնպաստի միկրո, փոքր եւ միջին բիզնեսների ընդլայնմանը, ներդրումների աճին եւ կօգնի ընկերություններին բարձրացնել մրցունակությունն ու դիմադրողականությունը։ Վարկային միջոցների առնվազն 20 տոկոսը ուղղվելու է էներգախնայող, վերականգնվող էներգիայի եւ կլիմայական կայունության նախագծերին։

Լրացուցիչ 7 միլիոն եվրոն Ինեկոբանկին կտրամադրվի EU4Business – ՎԶԵԲ վարկային գծի շրջանակում։ Այս միջոցները նախատեսված են հատուկ այն ընկերությունների համար, որոնք ներգրավում եւ ապահովում են աշխատատեղեր տեղահանված անձանց համար՝ նպաստելով նրանց սոցիալ-տնտեսական ներառմանը։ Այս փաթեթը նաեւ հնարավորություն կտա բիզնեսներին ներդնել նոր տեխնոլոգիաներ, բարձրացնել ծառայությունների որակը եւ համապատասխանել ԵՄ չափանիշներին։ Միջոցների առնվազն 70 տոկոսը նախատեսվում է ուղղել կանաչ տեխնոլոգիաների ներդրմանը, ինչը կնպաստի մրցունակության եւ ռեսուրսների օգտագործման արդյունավետության բարձրացմանը։

Ծրագրից օգտվող ընկերությունները հնարավորություն կունենան ստանալ ԵՄ-ի կողմից ֆինանսավորվող ներդրումային դրամաշնորհներ, որոնք կարող են կազմել վարկի մինչեւ 35 տոկոսը։ Վարկավորումն իրականացվելու է ՀՀ դրամով՝ ՎԶԵԲ-ի եւ ԵՄ-ի տեղական արժույթի ծրագրի շրջանակում, ինչը ձեռնարկություններին թույլ կտա իրականացնել ներդրումներ` փոխարժեքային տատանումներից անկախ։

Իմացիր ավելին

Մամուլի հաղորդագրություն