ՎԶԵԲ-ը 135 միլիոն եվրո վարկ է տրամադրում Արդշինբանկին՝ Հայաստանյան փոքր բիզնեսներին ֆինանսավորելու համար

Ս․ թ․ նոյեմբերի 26-ին Վերակառուցման եւ զարգացման եվրոպական բանկը (ՎԶԵԲ) 135 միլիոն եվրոյի (շուրջ 156 միլիոն ԱՄՆ դոլարի) չափով ֆինանսական փաթեթ տրամադրեց Հայաստանի խոշորագույն բանկին՝ Արդշինբանկին։

Միջոցները կնպաստեն միկրո, փոքր եւ միջին ձեռնարկությունների (ՄՓՄՁ) մրցունակության ամրապնդմանը, կխթանեն կանաչ ֆինանսավորումը եւ կտրամադրեն նպատակային աջակցություն փախստական ​​համայնքներին՝ նպաստելով նրանց ինտեգրմանը եւ զբաղվածության հնարավորություններին։

Ֆինանսական փաթեթը ձեւավորվել է Եվրոպական միության, Կանաչ կլիմայի հիմնադրամի (ԿԿՀ/GCF) եւ Կլիմայի ներդրումային ֆոնդի (ԿՆՖ/CIF) աջակցությամբ: Գործընկերները միասին նպաստում են Հայաստանի անցմանը դեպի ավելի կանաչ եւ ներառական տնտեսություն: Եկամուտների առնվազն մեկ երրորդը կուղղվի հատուկ համապատասխան կանաչ ներդրումներին, որոնք կբարելավեն ռեսուրսների արդյունավետության եւ վերականգնվող էներգիայի արտադրության ցուցանիշները։

Փաթեթի մեծ մասը՝ 110 միլիոն եվրոն, կուղղվի ՄՓՄՁ-ների մրցունակության բարձրացմանը եւ կայուն վարկավորման գործելակերպի խթանմանը՝ միաժամանակ ամրապնդելով Հայաստանի ֆինանսական համակարգի դիմակայունությունը: Արդշինբանկը նաեւ կօգտվի ՎԶԵԲ-ի չգիտակցված կողմնակալության վերաբերյալ նորարարական դասընթացից, որը ինտերակտիվ մոդուլ է՝ նախատեսված վարկավորման որոշումների կայացման գործընթացում արդարության ու ներառականության սկզբունքների պահպանմանը:

GCF-ի եւ CIF-ի աջակցությամբ եւս 20 միլիոն եվրո կտրամադրվի Կանաչ տնտեսության ֆինանսավորման ծրագրի (GEFF) շրջանակներում՝ ֆինանսավորելու վերականգնվող էներգիայի եւ էներգաարդյունավետության նախագծերում ներդրումները, ինչպիսիք են արեւային էներգիան, էլեկտրական տրանսպորտային միջոցները եւ լիցքավորման ենթակառուցվածքները։

Մնացած 5 միլիոն եվրոն կտրամադրվի «ԵՄ-ն բիզնեսի համար – ՎԶԵԲ» վարկային գծի շրջանակներում։ Արդշինբանկը կդառնա Հայաստանում առաջին բանկը, որը կստանա հատուկ վարկ՝ նախատեսված բացառապես տեղահանված անձանց տնտեսական ինտեգրմանը: Նրանց կտրամադրվի տեղական ՄՓՄՁ-ների համար նախատեսված ֆինանսավորման բարելավված հասանելիություն, որոնք կամ պատկանում են փախստականներին, կամ ստեղծում են աշխատատեղեր փախստականների համար: 

Հայաստանում ԵՄ դեսպան Վասիլիս Մարագոսը նշել է. «Աջակցելով վերականգնվող էներգիայի ոլորտում ներդրումներին եւ խթանելով արդար վարկավորման գործելակերպը՝ մենք ոչ միայն բարձրացնում ենք հայկական բիզնեսների մրցունակությունը, այլեւ ավելի դիմակայուն եւ արդար ապագա ենք ապահովում բոլոր քաղաքացիների համար»։

Ենթավարկերը կտրամադրվեն ՀՀ դրամով՝ ՎԶԵԲ-ի եւ ԵՄ-ի տեղական արժույթի (LCY) ծրագրի միջոցով, ինչը կօգնի ընկերություններին խուսափել փոխարժեքի հետ կապված ռիսկերից եւ ավելի մեծ վստահությամբ պլանավորել իրենց ներդրումները։

Իմացիր ավելին

Մամուլի հաղորդագրություն