Լեռնային Ղարաբաղ. ԵՄ-ը հայտարարում է, որ քաղաքացիական բնակչության բռնի տեղահանումը կստանա խիստ արձագանք
Սեպտեմբերի 21-ին Եվրոպական միությունը դատապարտել է Ադրբեջանի ռազմական գործողությունը Լեռնային Ղարաբաղի հայ բնակչության դեմ եւ ցավ հայտնել այս էսկալացիայի հետեւանքով տեղի ունեցած զոհերի եւ մարդկային կյանքերի կորստի կապակցությամբ։
ԵՄ-ը նաեւ հայտարարել է, որ ի գիտություն է ընդունել հրադադարի վերաբերյալ համապատասխան հայտարարությունները եւ ակնկալում է, որ «մարտական գործողություններն անհապաղ եւ ամբողջական կերպով կդադարեցվեն, ինչպես նաեւ կպահպանվի հրադադարը»։
Եվրոպական միությունը կոչ է արել Ադրբեջանին թույլատրել անհապաղ եւ անխոչընդոտ մարդասիրական հասանելիություն կարիքի մեջ գտնվող բնակչության համար, այդ թվում՝ ամբողջպես վերաբացելով Լաչինի միջանցքը.
«Մարդասիրական դերակատարները պետք է ազատորեն գործելու հնարավորություն ունենան: Եվրոպական միությունը եւ ԵՄ անդամ պետությունները պատրաստ են ցուցաբերել հրատապ մարդասիրական օգնություն»,- ասվում է Եվրոպական արտաքին գործողությունների ծառայության (ԵԱԳԾ) հայտարարության մեջ։
Եվրոպական միությունը նաեւ կոչ է արել Բաքվին եւ Ղարաբաղի հայերին «անհապաղ ներգրավվել համապարփակ եւ թափանցիկ երկխոսության մեջ»։
«Ադրբեջանը պատասխանատվություն է կրում՝ ապահովելու լիարժեք հարգանքը Ղարաբաղի հայերի անվտանգության ու իրավունքների նկատմամբ, ներառյալ՝ իրենց տներում առանց ահաբեկման կամ խտրականության ապրելու իրենց իրավունքը: Ռազմական կամ այլ ուժի կիրառմամբ քաղաքացիական բնակչության բռնի տեղահանումը կստանա Եվրոպական միության խիստ արձագանքը»,- ասվում է մամուլի հաղորդագրության մեջ։
Եվրոպական միությունը վերահաստատել է իր աջակցությունը՝ ինչպես Ադրբեջանի, այնպես էլ Հայաստանի ինքնիշխանությանը եւ տարածքային ամբողջականությանը եւ կոչ է արել Ադրբեջանին վերահաստատել իր անվերապահ հարգանքը Հայաստանի տարածքային ամբողջականությանը՝ 1991թ. Ալմաթիի հռչակագրի համաձայն։
Եվրոպական միությունը կոչ է արել վերսկսել բանակցությունները Հայաստանի եւ Ադրբեջանի միջեւ բոլոր առկա հարցերի շուրջ՝ խաղաղության պայմանագրի կնքման նպատակով եւ նշել, որ շարունակում է իր լիարժեք հանձնառությունն՝ աջակցելու այդ բանակցություններին։
Իմացիր ավելին
ԱՄԵՆԱԿԱՐԴԱՑԱԾ
ԱՌՆՉՎՈՂ ԹԵՄԱՆԵՐ
EU4Innovation East. Արեւելյան գործընկերության ստարտափները՝ Փարիզում կայացած VivaTech 2026 ցուցահանդեսի կենտրոնում
ԵՄ-ն Հայաստանին տրամադրում է 34 միլիոն եվրոյի անհետաձգելի աջակցություն
ԵՄ-ն գործարկում է Կապակցվածության օրակարգի հարթակը՝ Սեւծովյան տարածաշրջանով եւ Հարավային Կովկասով Եվրոպայի եւ Կենտրոնական Ասիայի միջեւ կապերն ամրապնդելու նպատակով
YEA10. Երիտասարդ եվրոպական դեսպանները տոնում են կապի, ոգեշնչման եւ փոփոխությունների տասնամյակը
ՎԶԵԲ-ը, ԵՄ-ն եւ ԱրմՍվիսԲանկն աջակցում են Հայաստանում փախստականներին եւ երիտասարդներին
Սույն կայքում առկա տեղեկատվությունը կարգավորվում է պատասխանատվության սահմանափակման և անձնական տվյալների պաշտպանության մասին դրույթներով:
© European Union,
