Հայաստանում Եվրոպական միության առաքելությունը նոր ղեկավար ունի

Փետրվարի 17-ին Եվրոպական միության խորհուրդը Սատու Կոյվուին նշանակեց Հայաստանում Եվրոպական միության առաքելության (ՀԵՄԱ/EUMA) նոր ղեկավար։ Նա իր պարտականությունները կստանձնի 2026 թվականի փետրվարի 20-ին՝ փոխարինելով Մարկուս Ռիտտերին։

Սատու Կոյվուն ֆիննական ոստիկանության բարձրաստիճան սպա է՝ ազգային եւ միջազգային ծառայության ավելի քան 35 տարվա փորձով: Նա ունի միջազգային ծառայության հարուստ փորձ՝ ղեկավար պաշտոններ զբաղեցնելով Պաղեստինյան տարածքում, Ռուանդայում, Նամիբիայում եւ Կիպրոսում ՄԱԿ-ի եւ ԵՄ առաքելություններում: Մինչեւ ԵՄ դիտորդական առաքելության ղեկավարի պաշտոնում նշանակվելը, նա աշխատել է Ֆինլանդիայի ազգային ոստիկանության խորհրդում՝ որպես մարդկային ռեսուրսների կառավարման ղեկավար (Էսպոո, Ֆինլանդիա):

ՀԵՄԱ-ն Հարավային Կովկասի տարածաշրջանում խաղաղության եւ կայունության աջակցման ԵՄ ջանքերի կարեւոր բաղադրիչ է: Առաքելության խնդիրն է դիտարկել եւ զեկուցել հայ-ադրբեջանական սահմանի հայկական կողմում տեղում տիրող իրավիճակի մասին՝ նպաստելով նաեւ այդ տարածքներում մարդկային անվտանգությանը: ՀԵՄԱ-ի ներկայիս մանդատը գործում է մինչեւ 2027 թվականի փետրվարի 19-ը:

Առաքելությունը բաղկացած է ավելի քան 200 միջազգային եւ տեղական աշխատակիցներից: ՀԵՄԱ դիտորդներն ու քաղաքացիական փորձագետները ԵՄ 25 անդամ պետություններից եւ երրորդ կողմ հանդիսացող մասնակից պետությունից՝ Կանադայից են:

Իմացիր ավելին

Մամուլի հաղորդագրություն

Սատու Կոյվուի կենսագրություն

Հայաստանում ԵՄ առաքելություն