ԵՄ-ն եւ Հայաստանը պայմանավորվել են ամրապնդել իրենց համագործակցությունը

2023թ. հունիսի 27-ից 28-ը Բրյուսելում կայացել է ՀՀ-ԵՄ Համապարփակ եւ ընդլայնված գործընկերության համաձայնագրի (ՀԸԳՀ) ներքո ստեղծված ՀՀ-ԵՄ Գործընկերության կոմիտեի չորրորդ նիստը։ 

ԵՄ-ն եւ Հայաստանը պայմանավորվել են ամրապնդել իրենց համագործակցությունը՝ ընդգծելով Հարավային Կովկասում ԵՄ ակտիվ ներգրավվածությունը, ինչպես նաեւ շարունակել համատեղ ջանքեր ներդնել ՀԸԳՀ կիրարկմանն ուղղությամբ՝ արձանագրելով մինչ այժմ գրանցված առաջընթացը։

Գործընկերության կոմիտեն քննարկել է զարգացումներն օրենքի գերակայության, արդարադատության, իրավապահ, կոռուպցիայի դեմ պայքարի, ինչպես նաեւ մարդու իրավունքների հարգանքի ոլորտներում։ ԵՄ-ն դրվատել է առաջընթացը նշյալ ոլորտներում։ Այնուամենայնիվ, ԵՄ-ն ընդգծել է դատական ​​համակարգի անկախության ու արդյունավետության, կոռուպցիայի դեմ պայքարի շարունակական բարելավման կարեւորությունը՝ հանրային հաստատությունների հանդեպ քաղաքացիների վստահությունը բարձրացնելու նպատակով: ԵՄ-ն նաեւ ընդգծել է խտրականության բոլոր դրսեւորումները վերացնելու համար հավելյալ ջանքեր գործադրելու անհրաժեշտությունը եւ խրախուսել Հայաստանին ներգրավել քաղաքացիական հասարակությանը օրենսդրական առաջարկների վերաբերյալ հանրային քննարկումներում:

Գործընկերության կոմիտեն նաեւ անդրադարձավ տրանսպորտին, էներգետիկային, շրջակա միջավայրին, կլիմայական գործողություններին եւ աղետների ռիսկերի կառավարմանն առնչվող հարցերում արձանագրված առաջընթացին: Եվրոպական միությունը եւ Հայաստանը կշարունակեն Մեծամորի ատոմակայանի անվտանգությունն ամրապնդելու ուղղությամբ համագործակցությունը: 

Հանդիպումը նաեւ հնարավորություն ընձեռեց վերանայելու մաքսային ոլորտում եւ տնտեսական զարգացման ուղղությամբ համագործակցությունը: Եվրոպական միությունն ընդգծեց մաքսային ոլորտում համագործակցելու կարեւորությունը՝ ՌԴ դեմ սահմանված ԵՄ պատժամիջոցները Հայաստանի տարածքի միջոցով շրջանցելու փորձերը կանխելու նպատակով: 

Իմացիր ավելին

Մամուլի հաղորդագրություն