Արևելյան գործընկերության գագաթնաժողովը ճանապարհ է հարթում տարածաշրջանում վերականգնման, դիմակայունության և բարեփոխումների համար

Արևելյան գործընկերության գագաթնաժողովը ճանապարհ է հարթում տարածաշրջանում վերականգնման, դիմակայունության և բարեփոխումների համար

16 Դեկտեմբերի, 2021

2021 թվականի դեկտեմբերի 15-ին Բրյուսելում հանդիպեցին Հայաստանի Հանրապետության, Ադրբեջանի Հանրապետության, Վրաստանի, Մոլդովայի Հանրապետության և Ուկրաինայի պետությունների կամ կառավարությունների ղեկավարները, Եվրոպական միության ներկայացուցիչները և վերջինիս անդամ երկրների պետությունների կամ կառավարությունների ղեկավարները:

Գագաթնաժողովը կենտրոնացած էր հինգ առանցքային ոլորտների աջակցության վրա՝ տնտեսություն, կառավարում, շրջակա միջավայր, թվայնացում և հասարակություն: Այս առաջնահերթությունները հիմնված են Եվրոպական հարևանության գործիքի անցյալի ձեռքբերումների վրա՝ հաշվի առնելով նոր մարտահրավերներն ու հնարավորությունները, մասնավորապես՝ «կանաչ» և թվային անցումը, ինչպես նաև հետհամավարակային վերականգնումը:

Արևելյան գործընկերության գագաթնաժողովի ընթացքում ընդունվել է համատեղ հռչակագիր:

Մասնակիցները վերահաստատեցին նախորդ գագաթնաժողովներում և երկկողմ համաձայնագրերում իրենց ստանձնած հանձնառությունները, ինչպես նաև դրանք առաջ տանելու վճռականությունը: «Այս ճանապարհին մեր հավակնոտ բարեփոխումների օրակարգը և ընդլայնված համագործակցությունը շարունակում են լինել առաջընթացի և աջակցության անհրաժեշտ պայմանը. տարածաշրջանում բարեկեցության մակարդակի բարձրացում և խաղաղության, կայունության ու դիմակայունության ամրապնդում, հատկապես՝ COVID-19 համավարակի համատեքստում»,- ասվում է հռչակագրում:

Փաստաթղթում մասնակիցները խորը մտահոգություն են արտահայտում Արևելյան գործընկերության տարածաշրջանի տարբեր մասերում շարունակական ապակայունացման և միջազգային իրավունքի սկզբունքների խախտումների առնչությամբ, որոնք սպառնալիք են ներկայացնում խաղաղության, անվտանգության և կայունության համար։

Հռչակագրում նաև ասվում է, որ ԵՄ-ն ափսոսում է Բելառուսի իշխանությունների՝ Արևելյան գործընկերությանն իրենց մասնակցությունը դադարեցնելու որոշման համար։ Միևնույն ժամանակ, ժողովրդավարական Բելառուսի տնտեսական աջակցության մոտ 3 միլիարդ եվրո բյուջեով համապարփակ ծրագիրն արտացոլում է ԵՄ հանձնառությունը՝ աջակցելու Բելառուսի ժողովրդի ժողովրդավարական ընտրությանը:

Բացի այդ, ԵՄ-ն ընդունել է ասոցացված գործընկերների եռյակի՝ Վրաստանի, Մոլդովայի Հանրապետության և Ուկրաինայի նախաձեռնությունը՝ ընդլայնելու ԵՄ-ի հետ իրենց համագործակցությունը։ Եվրոպական միությունը նաև ի գիտություն է ընդունել նրանց միջև աճող համակարգումը Ասոցացման համաձայնագրերի և ԽՀԱԱՀ-ների իրականացման հետ կապված ընդհանուր հետաքրքրություն ներկայացնող հարցերի և Արևելյան գործընկերության շրջանակներում համագործակցության շուրջ: Միևնույն ժամանակ, ԵՄ-ն և շահագրգիռ գործընկերները ողջունեցին 2021 թվականի մարտին ԵՄ-ՀՀ Համապարփակ և ընդլայնված գործընկերության համաձայնագրի ուժի մեջ մտնելը, ինչպես նաև ԵՄ-ի և Ադրբեջանի միջև նոր համապարփակ համաձայնագրի շուրջ ընթացող բանակցություններում առաջընթացը:

Հռչակագիրը նաև հիշեցնում է, որ Արևելյան գործընկերության «Վերականգնում, դիմակայունություն և բարեփոխումներ» նոր օրակարգը կառուցված է երկու հիմնասյուների շուրջ՝ կառավարում և ներդրումներ։ Այս օրակարգը կամրապնդվի 2,3 միլիարդ եվրո տարածաշրջանային տնտեսական և ներդրումային ծրագրով, որը կարող է մինչև 17 միլիարդ եվրո պետական և մասնավոր ներդրումներ մոբիլիզացնել տարածաշրջանի համար:

Գագաթնաժողովի մասնակիցներն ընդգծեցին, որ իրենք անհամբեր սպասում են 2023 թվականին կայանալիք Արևելյան գործընկերության հաջորդ գագաթնաժողովին, որը կլինի «նոր սերնդի առաջնահերթությունների և թիրախների իրականացման գնահատման և վերանայման առաջին հանգրվանը»:

Իմացիր ավելին

Մամուլի հաղորդագրություն




Հետաքրքրվա՞ծ եք վերջին նորություններով ու հնարավորություններով

Այս կայքը կառավարվում է 2020-2024թթ. համար Եվրամիության կողմից ֆինանսավորվող Արևելյան հարևանության տարածաշրջանային հաղորդակցության ծրագրի («ԵՄ արևելյան հարևաններ») կողմից: Ծրագիրը լրացնում և աջակցում է գործընկեր երկրներում ԵՄ պատվիրակությունների հաղորդակցական գործունեությանն ու աշխատում է Եվրոպական հանձնաժողովի Հարևանության քաղաքականության և ընդլայնման բանակցությունների գլխավոր տնօրինության ու ԵՄ արտաքին գործողությունների ծառայության ղեկավարության ներքո: Ծրագիրն իրականացնում է B&S Europe-ի գլխավորած կոնսորցիումը:

Սույն կայքում առկա տեղեկատվությունը կարգավորվում է պատասխանատվության սահմանափակման և անձնական տվյալների պաշտպանության մասին դրույթներով:
© Եվրոպական միություն,