საგრანტო კონკურსი კლიმატის ცვლილების შერბილებაზე ინოვაციურ იდეებს 9,000-მდე ევროთი დააფინანსებს

კავკასიის გარემოსდაცვითი არასამთავრობო ორგანიზაციების ქსელი (CENN) ევროკავშირის მხარდაჭერით საგრანტო კონკურსს აცხადებს. კონკურსზე მიიღება ინოვაციური იდეები, რომლებიც კლიმატის ცვლილების მიტიგაციისა და ადაპტაციის საკითხებს მოიცავს. 

საგრანტო კონკურსის მიზანი კახეთის (გურჯაანი, საგარეჯო და ახმეტა), იმერეთის (ზესტაფონი, ტყიბული და ჭიათურა), გურიის (ლანჩხუთი და ოზურგეთი) და რაჭა-ლეჩხუმის (ონი და ამბროლაური) რეგიონებში ინოვაციური და მდგრადი პროექტების დაფინანსებაა. 

კონკურში მონაწილეობა შეუძლიათ ადგილობრივ და ეროვნულ დონეზე მომუშავე სამოქალაქო საზოგადოებრივ ორგანიზაციებს, ცენტრალურ და ადგილობრივ ხელისუფლებას, ადგილობრივ სათემო ორგანიზაციებს, საგანმანათლებლო დაწესებულებებს, კომპანიებს, მეწარმეებს, ფერმერებს და სასოფლო-სამეურნეო კოოპერატივებს.

საპროექტო იდეები ხელს უნდა უწყობდეს კლიმატის ცვლილების გავლენის შერბილებას და კლიმატის ცვლილებისადმი ადაპტაციას, ადამიანის ჯანმრთელობის და გარემოს დაცვას, კლიმატის ცვლილების საკითხების საგანმანათლებლო დაწესებულებების დღის წესრიგში ინტეგრაციას და სექტორში მეტი ახალგაზრდა სპეციალისტის მოზიდვას.

გრანტების მოცულობებია 3,000-იდან 9,000-მდე ევროს ეკვივალენტი ლარში. 

საგრანტო იდეების წარდგენის ბოლო ვადაა 1 მარტი. 

დამატებითი ინფორმაცია

პრესრელიზი