უფლებამოსილი ახალგაზრდობა ძლიერი დემოკრატიის საფუძველია: ახალგაზრდობის ფორუმმა აღმოსავლეთ პარტნიორობის სამიტის წინ საკვანძო საკითხები განიხილა
2021 წლის 23-24 ნოემბერს გამართულმა აღმოსავლეთ პარტნიორობის ახალგაზრდობის მე-5 ფორუმმა 150-ზე მეტი ადამიანი შეკრიბა. მონაწილეთა შორის იყვნენ ახალგაზრდობის და ახალგაზრდული პოლიტიკის საკითხებზე მომუშავეები და აქტიური და კრიტიკულად მოაზროვნე ახალგაზრდები აღმოსავლეთ პარტნიორობის ქვეყნებიდან, ევროკავშირიდან და ევროკავშირის წევრი სახელმწიფოებიდან.
ფორუმი სახელწოდებით, „ახალგაზრდობის მონაწილეობა დემოკრატიულ პროცესებში“, ორგანიზებული იყო ევროკავშირის საბჭოს სლოვენიის თავმჯდომარეობის მიერ ევროკომისიასთან და ევროპის საგარეო ქმედებათა სამსახურთან თანამშრომლობით.
„უფლებამოსილი ახალგაზრდობა ძლიერი დემოკრატიის, პასუხისმგებლობიანი პოლიტიკის, ადამიანის უფლებების დაცვის და მდგრადობის საფუძველია“, — აღნიშნა ფორუმის გახსნაზე წარმოთქმულ სიტყვაში სლოვენიის საგარეო საქმეთა მინისტრმა, ანჟე ლოგარმა.
მიმდინარე წლის ახალგაზრდობის ფორუმის მთავარი თემის ცენტრალური საკითხი იყო ინკლუზიური გარემოს და ადეკვატური პირობების შექმნა დემოკრატიულ პროცესებში ახალგაზრდების მონაწილეობის წასახალისებლად.
ფორუმის მონაწილეებმა განიხილეს ახალგაზრდული პოლიტიკის მომავალი და შეიმუშავეს მისი კომპლექსური და ინკლუზიური განვითარებისთვის საჭირო რეკომენდაციები. ეს მიღწევები გათვალისწინებული იქნება იმ დისკუსიების დროს, რომლებიც 2021 წლის 15 დეკემბერს დაგეგმილ აღმოსავლეთ პარტნიორობის სამიტზე გაიმართება.
ახალგაზრდა ევროპელი ელჩების ქსელის წევრებმა აქტიური მონაწილეობა მიიღეს ფორუმის სემინარებში, რომლებზეც შემუშავდა რეკომენდაციები აღმოსავლეთ პარტნიორობის რეგიონის ახალგაზრდული პოლიტიკის გასავითარებლად და შესაბამის პროცესებში ახალგაზრდობის აქტიურად ჩასართავად.
„ვთვლი, რომ ახალგაზრდობის მონაწილეობა დემოკრატიულ პროცესებში აუცილებელი პირობაა იმისათვის, რომ საზოგადოების ფორმირება მოხდეს უშუალოდ მათ მიერ და მათთვის, ვინც მასში ცხოვრობს. ინკლუზიური მომავალი ვერ იარსებებს იმის გაუაზრებლად, რომ გადაწყვეტილების მიღების პროცესებში ახალგაზრდობის რეალური მონაწილეობა გადამწყვეტი მნიშვნელობისაა“, — განაცხადა ფორუმში მონაწილე 27 ახალგაზრდა ევროპელი ელჩიდან ერთ-ერთმა, მარია პია ნაპოლეტანომ.
ახალგაზრდობის ფორუმის მსვლელობის ხილვა ფორუმის სპეციალურ ვებსაიტზე შეგიძლიათ.
დამატებითი ინფორმაცია
ყველაზე წაკითხული
თემაზე
ირლანდია ევროკავშირის საბჭოს თავმჯდომარეობის მიღებისას უკრაინასა და სხვა კანდიდატ ქვეყნებს მხარდაჭერას აღუთქვამს
ევროკავშირისა და UNDP-ის ხელშეწყობით, საქართველოს მცირე და საშუალო ბიზნესი საერთაშორისო ბაზრებს ითვისებს
მამის დღე საქართველოში: UNFPA და ევროკავშირი ახალბედა მამებისთვის წიგნს წარმოადგენენ
ახალგაზრდა ევროპელი ელჩები ურთიერთობების, შთაგონების და ცვლილების ათწლეულს აღნიშნავენ
ევროკავშირის ინიციატივა, „საქართველო მწვანე მომავლისკენ“, 14 ივნისს თბილისში „შეკეთებისა და ხელახლა გამოყენების დღეს“ მართავს
ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,
