აღმოსავლეთ პარტნიორობის ქვეყნების საგარეო საქმეთა მინისტრების შეხვედრაზე ევროკავშირმა რეგიონის მიმართ აღებული ვალდებულებებისადმი ერთგულება დაადასტურა

15 ნოემბერს აღმოსავლეთ პარტნიორობის რეგიონის მინისტერიალი ჩატარდა. შეხვედრაში ევროკავშირის ქვეყნებისა და აღმოსავლეთ პარტნიორობის ექვსი ქვეყნიდან ხუთის — აზერბაიჯანის, მოლდოვის რესპუბლიკის, საქართველოს, სომხეთის და უკრაინის საგარეო საქმეთა მინისტრები მონაწილეობდნენ. მინისტერიალს საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ჯოზეფ ბორელი თავმჯდომარეობდა. შეხვედრას ასევე ესწრებოდა ევროკომისარი, ოლივერ ვარჰელი.

„ჩვენს აღმოსავლეთ პარტნიორებთან ძალიან კარგი დისკუსია გვქონდა. ბელარუსი მოწვეული არ იყო, მაგრამ ჩვენ ბელარუსელი ხალხისთვის სიმბოლურად შევინახეთ თავისუფალი სავარძელი“, — აღნიშნა ჯოზეფ ბორელმა.

შეხვედრის მონაწილეებმა ერთმანეთს გაუზიარეს მოსაზრებები იმის შესახებ, თუ როგორაა შესაძლებელი პარტნიორობის განვითარება და ამის შედეგად ადამიანების რეალური შედეგებით უზრუნველყოფა. განსაკუთრებული ყურადღება მიექცა ისეთ საკითხებს, როგორიცაა მმართველობა, ინვესტიციები და პარტნიორობის გაძლიერება სტაბილურობის, აღდგენის და რეფორმების განხორციელების მიზნით.

მინისტერიალზე კიდევ ერთხელ გაესვა ხაზი ევროკავშირის ერთგულებას რეგიონის მიმართ აღებული ვალდებულებებისადმი და ქვეყნების პოლიტიკურ ნებას, ითანამშრომლონ საერთო პრობლემების გადასაჭრელად. გარდა ამისა, მინისტრებმა ევროკავშირის და აღმოსავლეთ პარტნიორობის ამბიციური ახალი დღის წესრიგის პრაქტიკული განხორციელების საკითხიც განიხილეს.

ევროკავშირის უმაღლესმა წარმომადგენელმა ხაზი გაუსვა, რომ ევროკავშირი მომავალშიც დაუჭერს მხარს აუცილებელ რეფორმებს, თუმცა რეალურ სარგებელს მიიღებენ ის ქვეყნები, რომლებიც ამ რეფორმებს აქტიურად ახორციელებენ.

მინისტერიალის დისკუსიამ შექმნა საფუძველი აღმოსავლეთ პარტნიორობის 2021 წლის დეკემბრის სამიტისთვის, რომელზეც წარმოდგენილი იქნება ევროკავშირის და აღმოსავლეთ პარტნიორობის თანამშრომლობის განახლებული ხედვა და დამტკიცდება 2020 წლის შემდგომი პერიოდის დღის წესრიგი.

დამატებითი ინფორმაცია 

პრესრელიზი