Կանաչ աճի հիմնադրամն ընդլայնում է իր ներկայությունը Հայաստանում

Կանաչ աճի հիմնադրամը (GGF) հայտարարել է Հայաստանում իր ներկայության ընդլայնման մասին՝ առաջին անգամ «Արմենիան Լիզինգ Քամփնի»-ին տրամադրելով 2 մլն ԱՄՆ դոլարի (մոտ 1,9 մլն եվրո) վարկ, որի նպատակն է մեծացնել կանաչ ֆինանսավորման հասանելիությունը բիզնեսի եւ տնային տնտեսությունների համար:

Նշված միջոցները կծառայեն էներգաարդյունավետության եւ ռեսուրսարդյունավետության, ինչպես նաեւ վերականգնվող էներգիայի ուղղությամբ ներդրումներին՝ աջակցելով Հայաստանի անցմանը ավելի կանաչ տնտեսության:

Այս նոր գործընկերությամբ նշանավորվում է GGF-ի ընդլայնումը Հայաստանում՝ ամրապնդելով կանաչ ֆինանսական լուծումներ մշակելու եւ կայուն ներդրումներն ընդլայնելու համար տեղական ֆինանսական հաստատություններին աջակցելու նրա հանձնառությունը։

«GGF-ը հանձնառու է ընդլայնել կանաչ ֆինանսավորումը Հայաստանում՝ համագործակցելով առանցքային խաղացողների հետ, ինչպիսին է «Արմենիան Լիզինգ Քամփնի»-ն: Որպես շուկայում դինամիկ զարգացող հաստատություն եւ կանաչ ներդրումների հիմնական շարժիչ ուժ՝ նրանք օգնում են ձեռնարկություններին ինտեգրել էներգաարդյունավետ տեխնոլոգիաներ, լավարկել իրենց գործառնությունները եւ խթանել երկարաժամկետ տնտեսական աճն ու բարգավաճումը երկրում», — նշել է Կանաչ աճի հիմնադրամի տնօրեն Բորիսլավ Կոստադինովը:

Կանաչ աճի հիմնադրամը նպաստում է էներգաարդյունավետության բարձրացմանը եւ վերականգնվող էներգիայի խթանմանը Հարավարեւելյան Եվրոպայում, Կովկասում, Մերձավոր Արեւելքում եւ Հյուսիսային Աֆրիկայում: Տեղական ֆինանսական հաստատություններին վերաֆինանսավորում տրամադրելով՝ GGF-ն օգնում է բիզնեսին եւ տնային տնտեսություններին օգտվել կայուն էներգետիկ լուծումներից՝ խթանելով էներգաարդյունավետությունը եւ նվազեցնելով ածխածնի արտանետումները: GGF-ը նախաձեռնվել է որպես պետություն-մասնավոր համագործակցություն Եվրոպական ներդրումային բանկի եւ Գերմանիայի KfW զարգացման բանկի կողմից՝ Եվրոպական միության, BMZ-ի եւ այլ միջազգային ներդրողների ֆինանսական աջակցությամբ:

Իմացիր ավելին

Մամուլի հաղորդագրություն