Հայաստան. Լոռիում և Տավուշում ստեղծվել են նոր տեղական ակտիվ խմբեր

Լոռու և Տավուշի մարզերում ձևավորված 5 տեղական ակտիվ խմբեր (ՏԱԽ) հուլիսի 10-ին ստորագրեցին գործընկերության համաձայնագրեր: Ստորագրման արարողությունը տեղի ունեցավ Դիլիջանում կայացած «Գործընկերություն և գործողություն՝ հանուն Հայաստանում գյուղական բարգավաճման» միջազգային համաժողովի շրջանակում։

«Տաշիր +», «Լոռվա Ձոր», «ԳանՁոր», «Աղստևի հովիտ» և «Ծիլի Ծով» տեղական ակտիվ խմբերը ստեղծվել են ԵՄ ֆինանսավորմամբ «Տեղական դերակատարների զորեղացում հանուն զարգացման Լոռու և Տավուշի մարզերում» ծրագրի շրջանակներում։ Այս նախաձեռնությունը հիմնված է «LEADER» (Համայնքի կողմից առաջնորդվող տեղական զարգացման)  մեթոդաբանության վրա։

«LEADER-ը գործընկերության վրա հիմնված զարգացման մեթոդաբանություն է։ Այն ապացուցել է իր արդյունավետությունը՝ մարդկանց դնելով տեղական զարգացման կենտրոնում, միավորելով տեղական իշխանություններին, տեղական բիզնեսներին և քաղաքացիական հասարակությանը տեղական զարգացման տեսլական ձևավորելու և այդ զարգացումն առաջ մղելու գործում: Մենք լիահույս ենք, որ գործընկերության վրա խարսխված այս մոտեցումը կհաջողի Հայաստանում և կվերածվի տեղական զարգացման համար օգտակար ինստիտուցիոնալ գործիքի»,- իր ուղերձում նշել է Հայաստանում ԵՄ դեսպան Անդրեա Վիկտորինը։

Նորաստեղծ ՏԱԽ-երը մոտ ապագայում կառաջարկեն զարգացման ծրագրեր, որոնք ֆինանսական աջակցություն կստանան դոնոր կազմակերպություններից:

Իմացիր ավելին

Մամուլի հաղորդագրություն