Եվրոպական միությունը երկու տարով երկարացնում է Հայաստանում ԵՄ քաղաքացիական առաքելության մանդատը

Եվրոպական միության խորհուրդը ս.թ. հունվարի 30-ին ընդունեց որոշում, որով Հայաստանում Եվրոպական միության առաքելության (ՀԵՄԱ/EUMA) մանդատը երկարաձգվեց եւս երկու տարով՝ մինչեւ 2027 թվականի փետրվարի 19-ը։

Խորհուրդը որոշեց 2025 թվականի փետրվարի 20-ից մինչեւ 2027 թվականի փետրվարի 19-ը ժամանակահատվածի համար ՀԵՄԱ-ին հատկացնել ավելի քան 44 միլիոն եվրո։

ՀԵՄԱ-ն հիմնադրվել է ԵՄ խորհրդի որոշմամբ 2023 թվականի փետրվարի 20-ին, երբ այն նաեւ սկսել է իր գործառնական գործունեությունը։ Առաքելության հիմնական նպատակն է տեղում իրավիճակի դիտարկումն ու հաշվետվությունների պատրաստումը, հակամարտությունից տուժած շրջաններում մարդու անվտանգության ապահովումը, ինչպես նաեւ, հնարավորության դեպքում, Հայաստանի եւ Ադրբեջանի միջեւ վստահության ամրապնդմանն աջակցությունը։

«ՀԵՄԱ-ն ԵՄ-ի կողմից տարածաշրջանում խաղաղության ու կայունության աջակցության ուղղությամբ ներդրվող ջանքերի կարեւոր բաղադրիչ է», — ասվում է Եվրոպական միության խորհրդի տարածած մամաուլի հաղորդագրության մեջ. «Առաքելության մանդատային գործառույթները մնում են անփոփոխ՝ ՀԵՄԱ-ն եղել եւ շարունակում է մնալ անզեն քաղաքացիական առաքելություն»։

Առաքելությունը, որը գլխավորում է Մարկուս Ռիթերը, ունի ավելի քան 200 աշխատակից, այդ թվում՝ միջազգային եւ տեղական անձնակազմ։ ՀԵՄԱ-ի դիտորդներն ու քաղաքացիական փորձագետները ներկայացնում են ԵՄ 25 անդամ պետություններն ու երրորդ մասնակցող երկիրը՝ Կանադան։

Իմացիր ավելին

Մամուլի հաղորդագրություն

ՀԵՄԱ-ի կայքէջ