Եվրոպական հանձնաժողովը մեկնարկում է Հայաստանի հետ վիզային ռեժիմի ազատականացման շուրջ երկխոսությունը

Եվրոպական հանձնաժողովը ս.թ. հուլիսի 23-ին հայտարարել է վիզային ռեժիմի ազատականացման շուրջ Հայաստանի հետ երկխոսության մեկնարկի մասին։

Հանձնաժողովի մամուլի հաղորդագրության մեջ ասվում է, որ այս գործընթացը կօգնի Հայաստանին հասնել ԵՄ-ի հետ առանց վիզայի ռեժիմ սահմանելու իր երկարաժամկետ նպատակին։

Հաղորդագրությունում նաեւ ասվում է, որ երկխոսությունը կհանգեցնի բարեփոխումների այնպիսի կարեւոր ոլորտներում, ինչպիսիք են ճամփորդական փաստաթղթերի անվտանգությունը, սահմանների կառավարումը, միգրացիան եւ ապաստանը, հասարակական կարգը, արտաքին հարաբերությունները եւ Հայաստանում հիմնարար իրավունքները: Հանձնաժողովը Եվրոպական խորհրդարանի եւ Խորհրդի հետ սերտ համագործակցությամբ ուշադիր հետեւելու է այս ոլորտներում առաջընթացին:

Երկխոսությունը կանցկացվի վիզաների ազատականացման գործողությունների ծրագրի շրջանակում, որը Հայաստանի իշխանություններին կներկայացվի ԵՄ խորհրդում ս.թ. հուլիսի 22-ին անցկացված քննարկումից հետո։ 

«Վիզաների ազատականացումը ավտոմատ գործընթաց չէ։ Այն կքննարկվի միայն, երբ երկխոսությունը հաջողությամբ ավարտվի եւ գործողությունների ծրագրում թվարկված բոլոր պայմանները կատարվեն: Երկխոսության հաջող ավարտից հետո Հայաստանի քաղաքացիների համար ավելի հեշտ եւ էժան կլինի կարճաժամկետ այցերով Եվրոպա մեկնելը (ցանկացած 180 օրվա ընթացքում 90 օրից պակաս)»,- ասվում է Հանձնաժողովի հաղորդագրությունում։

ՀՀ քաղաքացիները 2014 թվականի հունվարի 1-ից արդեն օգտվում են ԵՄ-ի հետ վիզային ռեժիմի դյուրացման համաձայնագրի առավելություններից

Իմացիր ավելին

Մամուլի հաղորդագրություն