«Նեթվորքինգային» դրամաշնորհներ ԱլԳ երկրների ՔՀԿ-ների համար

«Քաղաքացիական հասարակության դիմակայունության բարձրացում Արեւելյան գործընկերությունում» (ERICS-EaP) ծրագրի շրջանակում հայտարարվում է «նեթվորքինգային» դրամաշնորհների մրցույթ, որը բաց է Արեւելյան գործընկերության (ԱլԳ) երկրների (Հայաստան, Ադրբեջան, Բելառուս, Վրաստան, Մոլդովա եւ Ուկրաինա) քաղաքացիական հասարակության կազմակերպությունների (ՔՀԿ) համար։ Դրամաշնորհների նպատակն է նպաստել նոր ցանցերի եւ համագործակցությունների ստեղծմանը եւ առկա ցանցերի ու համագործակցությունների ամրապնդմանը։

Ծրագիրը ֆինանսավորվում է Եվրոպական հանձնաժողովի կողմից եւ ղեկավարվում է Տրանսատլանտյան հիմնադրամի կողմից՝ ԱՄՆ-ի Գերմանական Մարշալի հիմնադրամի` «Սեւծովյան վստահություն տարածաշրջանային համագործակցության համար» ծրագրի հետ համագործակցությամբ։

ՔՀԿ-ները կարող են դիմել ֆինանսավորման՝ աջակցելու նեթվորքինգային գործունեության բազմապիսի ձեւերին, ներառյալ, բայց չսահմանափակվելով՝ տարածաշրջանային ցանցերի կառուցում, միջսահմանային համագործակցություն, լավագույն փորձի փոխանակում եւ շահերի պաշտպանություն: Նեթվորքինգային գործունեությունը կարող է կենտրոնանալ այնպիսի թեմաների վրա, ինչպիսիք են՝ ժողովրդավարության խթանումը, քաղաքացիական ակտիվությունը, մարդու իրավունքները, լրատվամիջոցները, ապատեղեկատվությունը/ աղավաղված տեղեկատվությունը, թափանցիկությունը, օրենքի գերակայությունը եւ այլն:

Յուրաքանչյուր դրամաշնորհի չափը կազմում է 30,000 եվրո՝ մինչեւ 12 ամիս տեւողությամբ նախագծի համար։

Դրամաշնորհային մրցույթին մասնակցելու իրավունք ունենալու համար ՔՀԿ-ները պետք է գրանցված լինեն (հնարավորության դեպքում) եւ ակտիվ լինեն Արեւելյան գործընկերության որեւէ երկրում: Ծրագրերը պետք է ներառեն առնվազն երեք Արեւելյան գործընկերության երկրների կազմակերպություններ:

Դիմումների ընդունման վերջնաժամկետը մարտի 13-ն է։

ERICS-EaP ծրագիրն ուղղված է խթանելու ներառական, դիմակայուն եւ ժողովրդավարական հասարակություններ Արեւելյան գործընկերության տարածաշրջանում: Սա ներառում է քաղաքացիական հասարակության կառույցների կարողությունների զարգացումը եւ նրանց ներգրավվածության ամրապնդումը Արեւելյան գործընկերության երկրներում ժողովրդավարացման, բարեփոխումների եւ վերականգնման գործընթացներում:

Իմացիր ավելին

Մամուլի հաղորդագրություն