Հայրիկները կարևոր են. ցուցապաստառների մրցույթ Հայաստանում

ՄԱԿ-ի Բնակչության հիմնադրամի հայաստանյան գրասենյակը և Գյումրու «Երիտասարդական նախաձեռնությունների կենտրոն» ՀԿ-ն «ԵՄ-ն հանուն կանանց և տղամարդկանց իրավահավասարության. Միասին ընդդեմ գենդերային կարծրատիպերի և բռնության» ծրագրի շրջանակներում մեկնարկել են Տղամարդկանց միջազգային օրվան (նոյեմբերի 19) նվիրված ցուցապաստառների մրցույթ։

«Ընտանիքում հայրիկների ներգրավվածության և հոգատարության կարևորությունը» խորագրով մրցույթի նպատակն է նպաստել աղջիկների ու տղաների, կանանց և տղամարդկանց իրավահավասարության խթանմանը, երեխայի խնամքի ու ծնողավարության մեջ տղամարդկանց ներգրավվածության մեծացմանը, կանանց ու տղամարդկանց դերերի վերաբերյալ կարծրատիպերի փոփոխմանը:

Լավագույն երեք նախագծերի հեղինակները կստանան դրամական մրցանակներ և իրենց ստեղծագործությունը մեծ ցուցատախտակների վրա ու տարբեր սոցիալական հարթակներում տեսնելու հնարավորություն։ Հաղթողը կստանա 180,000 ՀՀ դրամի չափով դրամական մրցանակ և իր ստեղծագործությունը Իջևան, Վանաձոր և Գյումրի քաղաքների փողոցներում՝ մեծ ցուցատախտակների վրա տեսնելու հնարավորություն։ Երկրորդ մրցանակը կազմում է 120,000 ՀՀ դրամ, իսկ երրորդը՝ 80,000 ՀՀ դրամ։

Յուրաքանչյուր մասնակից կարող է ուղարկել 1-3 աշխատանք (չափսը՝ 6000×3000 մմ, կետայնությունը՝ 300 dpi, դիրքը՝ հորիզոնական, տեքստերը (առկայության դեպքում)՝ հայերեն) մինչեւ ս.թ. սեպտեմբերի 23-ը:

Մրցանակների հանձնումը տեղի կունենա Տղամարդկանց միջազգային օրվան նվիրված միջոցառման ժամանակ:

Իմացիր ավելին

Մամուլի հաղորդագրություն