ახალგაზრდა ევროპელი ელჩები საქართველოდან

მსმენია ახალგაზრდა ევროპელი ელჩების შესახებ, მაგრამ არ ვიცი ვინ არიან და რას აკეთებენ ისინი

ახალგაზრდა ევროპელი ელჩების (YEAs) ინიციატივა – ეს არის არაპოლიტიკური, მოხალისეობრივი, დინამიკური საკომუნიკაციო ქსელი, რომელიც ერთმანეთთან მეგობრული ურთიერთობებით აკავშირებს ახალგაზრდებს შემდეგი ქვეყნებიდან: აზერბაიჯანი, ბელარუსი, მოლდოვას რესპუბლიკა, საქართველო, სომხეთი, უკრაინა, ევროკავშირის წევრი სახელმწიფოები და გაერთიანებული სამეფო. ქსელის მიზანია  ცნობიერების ამაღლება ევროკავშირის თანამშრომლობის საკითხებზე აღმოსავლეთ პარტნიორ ქვეყნებთან, ამ თანამშრომლობის რეალური შედეგების დემონსტრირება, პოლიტიკური დიალოგის ხელშეწყობა სხვადასხვა საკითხებზე, სამოქალაქო აქტივიზმის გაძლიერების მხარდაჭერა და თანამშრომლობა უკეთესი მომავლისათვის.

ახალგაზრდა ევროპელი ელჩების ინიციატივა ჩამოყალიბდა 2016 წლის ივნისში, როგორც პროექტის „EU NEIGHBOURS east“.

2021 წელს ექვს პარტნიორ ქვეყანაში, ევროკავშირის 27 წევრ სახელმწიფოში და გაერთიანებულ სამეფოში საქმიანობს 500-ზე მეტი ახალგაზრდა ევროპელი ელჩი, რომლებიც 20-ზე მეტ სხვადასხვა ეროვნებას წარმოადგენენ.

ახალგაზრდა ევროპელი ელჩები არიან სტუდენტები, ახალგაზრდა პროფესიონალები და სამოქალაქო აქტივისტები, რომლებიც ნებაყოფლობით უთმობენ საკუთარ დროს ასობით ღონისძიებაში მონაწილეობას ყველა აღნიშნულ ქვეყანაში და ონლაინ. აქ შეგიძლიათ გაეცნოთ მათ პროფილებს.

ახალგაზრდა ევროპელი ელჩების ინიციატივა საკუთარი ქსელის წევრებს სთავაზობს მოხალისეობას, კარიერულ წინსვლას და ლიდერობის უნარების განვითარებას. ახალგაზრდა ევროპელ ელჩებს წვლილი შეაქვთ და მონაწილეობენ შემდეგ ღონისძიებებში:

• საერთაშორისო ღონისძიებები, მათ შორის ევროპის ახალგაზრდული ფორუმები, აღმოსავლეთ პარტნიორობის კონფერენციები, სასწავლო მივლინებები ევროკავშირში და სემინარები მთელ რეგიონში და ევროკავშირის წევრ სახელმწიფოებში.
• ახალგაზრდა ევროპელი ელჩების აკადემია, ინფორმაციის მისაღებად ევროკავშირთან დაკავშირებული ძირითადი საკითხების შესახებ უშუალოდ ამ საკითხებზე ყოველდღიურად მომუშავე ექსპერტებისგან, რომელთა შორის არიან ევროკავშირის ოფიციალური პირები, დიპლომატები, ჟურნალისტები, სამოქალაქო საზოგადოების წარმომადგენლები და კომპანიები.
• მენტორობის პროგრამები, რომლებიც საშუალებას აძლევს მათ გახდნენ ტრენერები, მენტორები ან მრჩევლები ინიციატივის ფარგლებში, რათა შეძლონ საკუთარი ცოდნის და გამოცდილების თანატოლებისთვის გადაცემა.
• სამოქალაქო საზოგადოებრივი საქმიანობა, მაგ. დისკუსიები, სემინარები, იდეათონები, ტესტები, შეხვედრები, ვიზიტები სკოლებში, გამოფენები, ევროპის დღეები ან ცოცხალი დებატები ინსტაგრამზე, Bingo-ს თამაში ონლაინ, სოციალური მედია-კამპანიები, ვლოგები და გაცილებით უფრო მეტი.

რატომ უნდა გავხდე ახალგაზრდა ევროპელი ელჩი?

როგორც ახალგაზრდა ევროპელ ელჩს, გექნება შესაძლებლობა, შეხვდე მსგავსად მოაზროვნე ახალგაზრდებს და განავითარო შენი პიროვნული თვისებები და აიმაღლო პროფესიული კვალიფიკაცია. გაიცნობ მსგავსი აზრების და ინტერესების მქონე ახალგაზრდებს როგორც შენი, ისე სხვა ქვეყნებიდან. იმოგზაურებ საკუთარ ქვეყანაში, შეხვდები თანამოქალაქეებს და გააცნობ მათ ევროკავშირს, მის პარტნიორულ ურთიერთობას შენს ქვეყანასთან და მის მიერ შემოთავაზებულ შესაძლებლობებს. ამ ყველაფრის დახმარებით კი გაუმჯობესდება შენი გუნდური მუშაობის, პრობლემების გადაჭრის, ლიდერობის, კომუნიკაციის და მრავალ სხვა სფეროში უნარები. ეს უნარები ძალზე მნიშვნელოვანია შენი მომავალი კარიერისთვის!

საკუთარ საზოგადოებაში აქტიურობით, შესაძლებლობა გექნება, შენს მეგობრებს, ოჯახს და ქვეყანას აჩვენო, თუ როგორ საზოგადოებაში ისურვებდი ცხოვრებას. შეძლებ შენს ირგვლივ მყოფი ადამიანების გაძლიერებას და მოახდენ გავლენას მათ ცხოვრებაზე!

და ბოლოს, რაც ყველაზე მნიშვნელოვანია, ახალგაზრდა ევროპელი ელჩის სტატუსი გაძლევს შესაძლებლობას, შეიძინო მეგობრები, გაუზიარო სხვებს საკუთარი ცოდნა და გამოცდილება, ან უბრალოდ აღმოაჩინო საკუთარი თავი და სამყარო შენს გარშემო!

მივიღებ ანაზღაურებას, თუ ვიმუშავებ, როგორც ახალგაზრდა ევროპელი ელჩი?

ინიციატივა „ახალგაზრდა ევროპელი ელჩები“ მოხალისეობრივი ინიციატივაა და შენ ანაზღაურებას არ მიიღებ.

ახალგაზრდა ევროპელი ელჩების საქმიანობის ორგანიზების ხარჯებს ფარავს პროექტი „EU NEIGHBOURS east“. ამ საქმიანობის მაგალითებია სკოლებში და უნივერსიტეტებში ვიზიტების ორგანიზება ინტერაქტიული სემინარების ჩასატარებლად; გარემოს დაცვის ღონისძიებები (მაგ., ხეების დარგვა; დასუფთავების ღონისძიებებები და სხვ.), საერთაშორისო ღონისძიებებში მონაწილეობა საზღვარგარეთ, და მრავალი სხვა.

მინდა გავხდე ახალგაზრდა ევროპელი ელჩი, როგორ უნდა შევიტანო განაცხადი?

შენ შეგიძლია განაცხადის შეტანა, თუკი:

• ხარ ევროკავშირის, დიდი ბრიტანეთის ან აღმოსავლეთ პარტნიორობის ექვსიდან ერთ-ერთი წევრი ქვეყნის (აზერბაიჯანი, ბელარუსი, მოლდოვას რესპუბლიკა, საქართველო, სომხეთი, უკრაინა) მოქალაქე
• ხარ 16-დან 26 წლამდე ასაკის
• კარგად იცი ინგლისური
• დაინტერესებული ხარ ევროკავშირის საქმიანობით და პარტნიორული ურთიერთობით და თანამშრომლობით ევროკავშირსა და შენს ქვეყანას შორის
• დაინტერესებული ხარ სახალხო დიპლომატიით და ხალხთან ურთიერთობით, მზად ხარ გაუზიაროთ სხვებს ცოდნა, გამოცდილება და ინფორმაცია
• მოტივირებული ხარ შენი ქვეყნის და მისი საზოგადოების განვითარებაში წვლილის შესატანად
• დაინტერესებული ხარ მოხალისეობრივი საქმიანობით და მზად ხარ საკმარისი დრო დაუთმო სამოქალაქო ჩართულობის ღონისძიებებს.

იხილე შერჩევის კრიტერიუმები სრულად და კითხვა-პასუხი აქ. განაცხადის შეტანა ყოველწლიურ კონკურსზე შეგიძლია აქ.

როგორ ხდება ახალგაზრდა ევროპელი ელჩების შერჩევა?

იმისათვის, რომ გახდე ახალგაზრდა ევროპელი ელჩი, საჭიროა შემდეგი პროცესის გავლა. პირველი ეტაპია ინტერესის გამოხატვა ახალგაზრდა ევროპელი ელჩის პოზიციის დასაკავებლად ყოველწლიურ კონკურსზე განაცხადის შეტანის საშუალებით. განაცხადების მიღების დამთავრების შემდეგ, გასავლელია კიდევ რამდენიმე ეტაპი, რომლებიც კანდიდატებისგან დამატებით ძალისხმევას მოითხოვს. შერჩეულ კანდიდატებს მიიწვევენ გასაუბრებაზე, შემდეგ კი იმ კანდიდატებს, ვინც წარმატებით გაივლის გასაუბრებას, სთხოვენ დამატებითი ინფორმაციის წარმოდგენას (მაგ. პროფილის ფოტო, თანხმობის ფორმაზე ხელმოწერა, მოკლე პერსონალური ისტორია ვებსაიტის პირადი გვერდისთვის და სხვ.).  საბოლოო ეტაპზე პროფილები გაიგზავნება დასამტკიცებლად ოფიციალურ წარმომადგენლებთან. ამ პროცესს, განაცხადების მიღების დამთავრების თარიღიდან საბოლოო შედეგების გამოცხადებამდე დაახლოებით რვა კვირა სჭირდება. პროცესი შეიძლება ხანგრძლივად მოგეჩვენოთ, მაგრამ ის უფრო მარტივია, ვიდრე ერთი შეხედვით ჩანს!

რამდენი ახალგაზრდა ევროპელი ელჩია საქართველოში? რა აქვთ მათ დღემდე გაკეთებული?

საქართველოში სულ 87 ახალგაზრდა ევროპელი ელჩია. მათთან შესახვედრად დააწკაპუნეთ აქ!

დღემდე, ახალგაზრდა ევროპელმა ელჩებმა საქართველოში მოაწყვეს და მონაწილეობა მიიღეს 190-მდე სამოქალაქო საზოგადოებრივ ღონისძიებაში. მაგალითად, აქტიური ქართველი ახალგაზრდა ევროპელი ელჩების ინიციატივით დაარსდა ყვარლის ევროკლუბი, რომლის მიზანია დებატების წახალისება ევროკავშირთან დაკავშირებულ საკითხებზე მოსწავლეებს შორის #1 საჯარო სკოლაში.

სხვა ღონისძიებები ორიენტირებულია შემდეგ საკითხებზე:

• ვიზიტები სკოლებსა და უნივერსიტეტებში საკუთარი ცოდნის გასაზიარებლად ევროკავშირისა და იმ შესაძლებლობების შესახებ, რომელსაც ევროკავშირი ახალგაზრდებს სთავაზობს
• გარემოსდაცვითი ღონისძიებები
• საერთაშორისო და სახალხო დიპლომატიის ღონისძიებები
• სოციალური საკითხები

იხილეთ ისინი საქმიანობისას აქ.

მე ვერ გავხდები ახალგაზრდა ევროპელი ელჩი, მაგრამ მინდა მონაწილეობის მიღება მათ საქმიანობაში: ეს შესაძლებელია?

დიახ! იმ შემთხვევაშიც კი, თუ არ ხარ ახალგაზრდა ევროპელი ელჩი, შეგიძლია მათ მიერ ორგანიზებულ ღონისძიებებში მონაწილეობა! დაინტერესდი? თუ ასეა, გაიგე, როგორ შეგიძლია მიიღო უახლესი ინფორმაცია სხვადასხვა აქტივობების შესახებ:

• მოიწონე  EU NEIGHBOURS east ოფიციალური Facebook და Instagram გვერდები – ჩვენ რეგულარულად მოგაწვდით ინფორმაციას იმ ახალი გზების შესახებ, რომელთა საშუალებით შეძლებ ახალგაზრდა ევროპელი ელჩების საქმიანობაში ჩართვას შენს ქვეყანაში!

• გაერთიანდი „ახალგაზრდა ევროპელი მეზობლების“ ქსელში Facebook-ზე – რეგულარულად მიიღე ინფორმაცია ახალგაზრდა ევროპელი ელჩების შესახებ და ჩაერთე რომელიმე კონკურსში ან გამოწვევაში!