Սյունիքի մարզում կանցկացվի գաղափարատոն՝ ուղղված ներքին տեղահանված անձանց եւ նրանց ընդունող համայնքների շրջանում ձեռներեցության խթանմանը

Եվրոպական միության կողմից ֆինանսավորվող եւ «Հայկական Կարիտաս» ԲՀԿ-ի, «ԻՐԻՍ բիզնես ինկուբատոր» հիմնադրամի եւ «Իմփաքթ Հաբ Արմենիա» սոցիալական նորարարության զարգացման հիմնադրամի կողմից իրականացվող Three4ResilientArmenia ծրագիրը կազմակերպում է երկօրյա գաղափարատոն, որը նպատակ ունի նպաստել Լեռնային Ղարաբաղից տեղահանվածների եւ հյուրընկալող համայնքների սոցիալական ներառմանն ու տնտեսական ինտեգրմանը։

Միջոցառումն անցկացվելու է մայիսի 16-17-ը՝ Գորիսում գտնվող «Իմփաքթ Հաբ Սյունիք»-ի տարածքում։

Ծրագրի նպատակն է նպաստել նշված թիրախային խմբերի սոցիալական եւ տնտեսական ինտեգրմանը: Գաղափարատոնը համատեղում է ուսուցողական, թիմային աշխատանքի եւ խաղային տարրեր՝ նպատակ ունենալով խթանել ձեռնարկատիրական մտածողությունը, օգնել մասնակիցներին բացահայտել իրենց ձեռնարկատիրական ներուժը եւ տրամադրել գործիքներ՝ գաղափարներն իրական բիզնեսի վերածելուն նպաստելու համար:

Մրցույթին կարող են մասնակցել 18 տարեկանից բարձր բոլոր անձինք, այդ թվում՝ 2020 եւ 2023 թվականներին Լեռնային Ղարաբաղից ներքին տեղահանվածները, 2020 թվականի պատերազմի մասնակիցները, ընդունող համայնքներում բնակվող տեղացի բնակիչները, ուսանողներն ու երիտասարդները, ինչպես նաեւ ձեռներեցությամբ հետաքրքրված այլ անձինք։

Հայտադիմումների ընդունման վերջնաժամկետը լրանում է մայիսի 10-ին։

Իմացիր ավելին

Միջոցառման էջը Facebook-ում