Թվինինգը Եվրոպական միության անդամ պետությունների և շահառու կամ գործընկեր երկրների պետական կառավարման մարմինների միջև ինստիտուցիոնալ համագործակցության համար նախատեսված ԵՄ գործիքն է:

Թվինինգ ծրագրերը միավորում են ԵՄ անդամ պետությունների և շահառու երկրների հանրային հատվածի մասնագետներին՝ նպատակ ունենալով գործընկերային գործունեության միջոցով հասնել կոնկրետ պարտադիր գործառնական արդյունքների:

Թվինինգի նպատակն է բարելավել գործընկեր երկրի պետական կառավարման կարողությունները՝ նրա անձնակազմի վերապատրաստման և կառուցվածքի վերակազմավորմանն աջակցելու միջոցով: Այն նաև աջակցում է ազգային օրենքների, կանոնակարգերի և որակի ստանդարտների մոտարկմանը ԵՄ անդամ պետությունների ստանդարտներին՝ ԵՄ-ի հետ ստորագրված Համագործակցության կամ Ասոցացման համաձայնագրերի շրջանակներում։

Թվինինգ ծրագրեր նախաձեռնելիս ԵՄ-ն հենվում է իր անդամ պետությունների համագործակցության և կառավարման փորձի վրա, որի շրջանակում մասնագետներ են ներգրավվում ինչպես պետական կառավարման մարմիններից, այնպես էլ կիսապետական կառույցներից: Թվինինգի ռեզիդենտ խորհրդականը անդամ պետությունից շահառու երկրի համապատասխան մարմին է գործուղվում 12-ից 36 ամիս ժամկետով և տվյալ ծրագրի իրականացման ողջ ընթացքում համակարգում է դրա գործունեությունը:

Թվինինգ ծրագրի աշխատանքային պլանը սովորաբար նախատեսում է կարճաժամկետ և միջնաժամկետ փորձագիտական առաքելություններ, գործընկեր երկրի համապատասխան մարմնում վերապատրաստման միջոցառումներ, ինչպես նաև տեղեկատվական - լուսավորչական այցեր դեպի ԵՄ անդամ պետություններ:

Թվինինգ ծրագրին մասնակցող գործընկեր երկրի պետական մարմինը բավարար աշխատակազմ և ԵՄ անդամ երկրի՝ համանման կառուցվածք և մանդատ ունեցող մարմնի հետ համագործակցության համար անհրաժեշտ կարողություններ ունեցող պետական կառույց է։ Գործընկեր երկիրը պետք է մոբիլիզացնի իր անձնակազմը, դրսևորի տևական նվիրվածություն, պատասխանատվություն ու հարմարվողականություն և կայուն կերպով յուրացնի փոփոխություններն ու լավագույն փորձը: Թվինինգը միակողմանի տեխնիկական աջակցության գործիք չէ, այլ համատեղ պարտավորություն, որտեղ հաջողությունը ընդհանուր ձեռքբերում է:

Թվինինգ ծրագրերն իրականացվում են պարտադիր արդյունքների հասնելու նպատակով: Դրանք սովորաբար ձևակերպվում են ակնկալվող արդյունքներին համապատասխանող բաղադրիչներով և նախատեսում են մի շարք գործողություններ, ներառյալ սեմինարներ, վերապատրաստման դասընթացներ, փորձագիտական առաքելություններ, ուսումնական այցեր, պրակտիկա և խորհրդատվություն: Թվինինգը հիմնված է «սովորել անելով» սկզբունքի և լավագույն փորձի փոխանակման վրա: