ЕС асуджае новую хвалю пераследу прадстаўнікоў дэмакратычных сілаў Беларусі 

29 лістапада Еўрапейскі саюз асудзіў новыя атакі на прадстаўнікоў дэмакратычных сілаў Беларусі ды іх сваякоў. “Гэтыя напады з’яўляюцца новай ганебнай праявай рэпрэсіяў і злоўжывання ўладай, якія працягвае ажыццяўляць Лукашэнка і яго рэжым”.

У аўторак улады правялі ператрусы ў кватэрах ключавых фігураў дэмакратычных сілаў Беларусі і іх родных, анансавалі арышт маёмасці і актываў.

“Улады ў Мінску распачалі новую хвалю пераследу прадстаўнікоў дэмакратычных сілаў Беларусі. Атакі скіраваныя на тое, каб запалохаць і прыбраць патэнцыйных палітычных апанентаў, асабліва напярэдадні парламенцкіх выбараў, якія павінны адбыцца ў лютым наступнага года”, зазначыў у сваёй заяве Высокі прадстаўнік ЕС Жазэп Барэль.

Барэль дадаў, што ЕС будзе і надалей падтрымліваць “усіх, хто мужна выступае за незалежную і дэмакратычную Беларусь, і гатовы прыняць далейшыя меры ў адказ на сур’ёзныя парушэнні правоў чалавека, якія працягваюцца”.

Ён таксама заклікаў рэжым устрымацца ад любых далейшых рэпрэсіяў і гвалту ў дачыненні да народу Беларусі ды неадкладна і без умоваў вызваліць усіх палітычных зняволеных.

Даведацца больш:

Прэс-рэліз