ევროკავშირის 2021 წლის საპრიზო კონკურსი ჟურნალისტიკაში — განაცხადები 30 ნოემბრამდე მიიღება

საქართველოში ევროკავშირის წარმომადგენლობამ ჟურნალისტიკის დარგში  ევროკავშირის 2021 წლის კონკურსის შესახებ ბოლო განცხადება გამოაქვეყნა. 

საქართველოში ევროკავშირის წარმომადგენლობის მიერ 2012 წელს დაარსებული კონკურსი ქართულ ჟურნალისტიკაში პროფესიონალიზმის და ეთიკის ნორმების დამკვიდრების მხარდასაჭერად ტარდება. გარდა ამისა, ევროკავშირის სადამკვირვებლო მისია (EUMM) გასცემს სპეციალურ პრიზს „კონფლიქტების მიმართ სენსიტიური საუკეთესო ნაშრომისთვის“, რომელიც ნდობის აღდგენას და მშვიდობის დამკვიდრებას ემსახურება.

2021 წლის ჟურნალისტიკის კონკურსის პრიზი შვიდ კატეგორიაში გაიცემა:

• საუკეთესო სტატია ბეჭდურ ან ელექტრონულ მედიაში;
• საუკეთესო სიუჟეტი სამაუწყებლო ან ელექტრონულ მედიაში;
• საუკეთესო საგამოძიებო სტატია ან სიუჟეტი ბეჭდურ, ელექტრონულ ან სამაუწყებლო მედიაში;
• საუკეთესო ბლოგი/საავტორო სტატია/სვეტი ბეჭდურ, ელექტრონულ ან სამაუწყებლო მედიაში;
• ყველაზე ორიგინალური და ინოვაციური ნაშრომი ბეჭდურ, ელექტრონულ ან სამაუწყებლო მედიაში;
• ევროკავშირის ფასეულობების ამსახველი საუკეთესო დოკუმენტური ფოტო;
• კონფლიქტების მიმართ სენსიტიური საუკეთესო ჟურნალისტური ნაშრომი, რომელიც ხელს უწყობს საქართველოში მომხდარი შეიარაღებული კონფლიქტების კონტექსტში ნდობისა და მშვიდობის აღდგენას (ევროკავშირის სადამკვირვებლო მისიის სპეციალური პრიზი სამშვიდობო ჟურნალისტიკაში).

პირველ ექვს კატეგორიაში გამარჯვებულებს ფულადი პრიზები გადაეცემათ. სამშვიდობო ჟურნალისტიკაში ევროკავშირის სადამკვირვებლო მისიის პრიზის მფლობელი კი „ომისა და მშვიდობის გაშუქების“ ინსტიტუტის ლონდონის ოფისში 30-დღიან სტაჟირებას გაივლის.

საკონკურსო ნაშრომების წარდგენის ბოლო ვადაა 30 ნოემბერი.

დამატებითი ინფორმაცია

პრესრელიზი

შეიტანეთ განაცხადი