ჟურნალისტიკაში ევროკავშირის 2021 წლის პრიზის მოსაპოვებლად კონკურსი გამოცხადდა

3 მაისს, თავისუფალი პრესის მსოფლიო დღეს, საქართველოში ევროკავშირის ელჩმა, კარლ ჰარცელმა ჟურნალისტიკაში ევროკავშირის 2021 წლის პრიზის მოსაპოვებლად კონკურსი გამოაცხადა.

ევროკავშირის პრიზი ჟურნალისტიკაში ევროკავშირის წარმომადგენლობამ საქართველოში 2012 წელს დააარსა. მისი მიზანი ქართულ მედიაში პროფესიონალიზმისა და ჟურნალისტური ეთიკის კოდექსის ნორმების დამკვიდრების ხელშეწყობაა.

2021 წელს ევროკავშირის პრიზი ჟურნალისტიკაში შემდეგ შვიდ კატეგორიაში გაიცემა:

• საუკეთესო სტატია ბეჭდურ ან ელექტრონულ მედიაში;
• საუკეთესო სიუჟეტი სამაუწყებლო ან ელექტრონულ მედიაში;
• საუკეთესო საგამოძიებო სტატია ან სიუჟეტი ბეჭდურ, ელექტრონულ ან სამაუწყებლო მედიაში;
• საუკეთესო ბლოგი, საავტორო სტატია ან სვეტი ბეჭდურ, ელექტრონულ ან სამაუწყებლო  მედიაში;
• ყველაზე ორიგინალური და ინოვაციური ნაშრომი ბეჭდურ, ელექტრონულ ან სამაუწყებლო მედიაში;
• ევროკავშირის ფასეულობების ამსახველი საუკეთესო დოკუმენტური ფოტო;
• კონფლიქტების მიმართ სენსიტიური საუკეთესო ჟურნალისტური ნაშრომი, რომელიც ხელს უწყობს საქართველოში მომხდარი შეიარაღებული კონფლიქტების კონტექსტში ნდობისა და მშვიდობის აღდგენას (ევროკავშირის სადამკვირვებლო მისიის (EUMM) სპეციალური პრიზი სამშვიდობო ჟურნალისტიკაში).

პირველ ექვს კატეგორიაში გამარჯვებულებს ფულადი ჯილდოები გადაეცემათ. სამშვიდობო ჟურნალისტიკაში ევროკავშირის სადამკვირვებლო მისიის სპეციალური პრიზის მფლობელი კი „ომისა და მშვიდობის გაშუქების ინსტიტუტის“ ლონდონის ოფისში 30-დღიან სტაჟირებას გაივლის.

საკონკურსო ნამუშევრების წარდგენის ბოლო ვადაა 2021 წლის 30 ნოემბერი.
დამატებითი ინფორმაცია

პრესრელიზი