Frontex-მა საქართველოსთან სამუშაო შეთანხმება განაახლა

ევროპის სასაზღვრო და სანაპირო დაცვის სააგენტომ, Frontex-მა საქართველოს შინაგან საქმეთა სამინისტროსთან სამუშაო შეთანხმება განაახლა. ვირტუალურად გამართულ ცერემონიაზე დოკუმენტს ხელი Frontex–ის აღმასრულებელმა დირექტორმა, ფაბრის ლეგერიმ და საქართველოს შინაგან საქმეთა მინისტრმა, ვახტანგ გომელაურმა მოაწერეს.

განახლებულ სამუშაო შეთანხმებაში გათვალისწინებულია Frontex-ის უფრო ფართო მანდატი, რაც საზღვრის მართვის სფეროში არსებულ საჭიროებებზე უკეთ და ფუნდამენტური უფლებების სრული დაცვით რეაგირების შესაძლებლობას იძლევა. განახლებული შეთანხმების ფარგლებში Frontex–მა და საქართველომ კიდევ ერთხელ გამოთქვეს მზადყოფნა, ითანამშრომლონ არალეგალურ მიგრაციასთან და ტრანსსასაზღვრო დანაშაულთან ბრძოლაში. თანამშრომლობა ასევე მოიცავს ტექნიკური დახმარების პროექტების განხორციელებას და საზღვრის მართვის სფეროში ინფორმაციისა და გამოცდილების გაზიარებას.

“Frontex-სა და საქართველოს შორის პირველ სამუშაო შეთანხმებას ათ წელზე მეტი ხნის წინ, 2008 წელს მოეწერა ხელი. დარწმუნებული ვარ, რომ მისი განახლებით შევძლებთ, კიდევ უფრო მეტ პროგრესს მივაღწიოთ საზღვრების დაცვის და საერთო პრობლემების კოორდინირებულად მოგვარების საქმეში”, — განაცხადა ფაბრის ლეგერიმ.

ასობით ქართველმა ექსპერტმა Frontex-ის მიერ ორგანიზებულ  ტრენინგებსა და ისეთ ინიციატივებში მიიღო მონაწილეობა, როგორიც აღმოსავლეთ პარტნიორობის ქვეყნებში საზღვრის ინტეგრირებული მართვის (IBM) პოტენციალის განვითარების პროექტია. გარდა ამისა, ქართველი ექსპერტები Frontex-ის ოპერაციებში დამკვირვებლის სტატუსით მონაწილეობდნენ.

დამატებითი ინფორმაცია

პრესრელიზი