ევროპის საინვესტიციო ბანკის პრეზიდენტი სოფელ ჯიღაურაში ევროკავშირის მიერ დაფინანსებულ სასოფლო-სამეურნეო პროექტს ესტუმრა

2 მარტს ევროპის საინვესტიციო ბანკის პრეზიდენტი, ვერნერ ჰოიერი სოფელ ჯიღაურაში გარემოს დაცვის და სოფლის მეურნეობის სამინისტროს სამეცნიერო-კვლევით ცენტრს ეწვია. სამეცნიერო ცენტრი 2019 წლიდან მოყოლებული ევროკავშირის 5.2 მილიონი ევროს ბიუჯეტის მქონე პროექტის ერთ-ერთი ბენეფიციარია. პროექტს გაეროს სურსათისა და სოფლის მეურნეობის ორგანიზაცია (FAO) ახორციელებს.
 
პრეზიდენტმა ჰოიერმა მოინახულა ვაზის კოლექციები, შეხვდა ევროკავშირის ბენეფიციარ ადგილობრივ ფერმერებსა და ბიზნესების მფლობელებს და დაათვალიერა პროექტის ფარგლებში აშენებული ეკრანული სათბურები.  

ევროკავშირის მხარდაჭერით მოქმედი ამ პროექტების მიზანი საქართველოს ვაზის ნერგების სექტორის სერტიფიცირებაა. ეს, თავის მხრივ, ფერმათა მოსავლის ზრდას, სანერგე სექტორის განვითარებასა და ევროკავშირის ბაზარზე ქართული ექსპორტის გატანას შეუწყობს ხელს. ინიციატივა ევროკავშირის მიერ მხარდაჭერილ იმ 200-ზე მეტ პროექტს შორისაა, რომელიც საქართველოს განვითარებას უწყობს ხელს.

„ჩემზე დიდი შთაბეჭდილება მოახდინა საქართველოს სოფლის მეურნეობამ და იმ ადამიანების შემოქმედებითმა უნარმა, ვინც წარმატებას არა მარტო საქართველოს, არამედ ევროპულ ბაზრებზეც მიაღწია“, — აღნიშნა ჰოიერმა, — „ევროკავშირი და ევროპის საინვესტიციო ბანკი ამ სექტორის ზოგად განვითარებას უჭერს მხარს. სწორედ ამ დახმარების ნაწილია ცალკეული მცირე და საშუალო საწარმოების დაფინანსება, რომელიც საქართველოში მოქმედი ჩვენი პარტნიორი ბანკების საშუალებით ხორციელდება“.

ევროპის საინვესტიციო ბანკის პრეზიდენტმა, ამასთან, ლიბერთი ბანკთანაც გააფორმა ხელშეკრულება. დოკუმენტის თანახმად, საქართველოს მიკრო-, მცირე და საშუალო საწარმოებისთვის ამჟამად არსებული საკრედიტო ხაზი დამატებით 2.5 მილიონი ევროთი გაიზრდება, რაც ჯამურად 17.5 მილიონი ევროს პაკეტს შეადგენს.

დამატებითი ინფორმაცია

პრესრელიზი

ვაზის ენდემური ჯიშების დასაცავად ევროკავშირი საქართველოს ეკრანული სათბურების შექმნაში ეხმარება

ევროპის საინვესტიციო ბანკი პანდემიის საპასუხოდ ქართული ბიზნესების მხარდაჭერას აფართოებს