ევროკავშირი სამხრეთ ოსეთის ადმინისტრაციულ სასაზღვრო ხაზზე ყველა გადაკვეთის პუნქტის გახსნის საჭიროებას უსვამს ხაზს

ევროკავშირი ცხინვალის (ეგრეთ წოდებული სამხრეთ ოსეთის) დე-ფაქტო ხელისუფლებას და რუსეთის ფედერაციას მოუწოდებს, დაუშვან სამხრეთ ოსეთის ადმინისტრაციულ სასაზღვრო ხაზზე ყველა გადაკვეთის პუნქტის გახსნა. ამის შესახებ ევროკავშირის ელჩის კარლ ჰარცელის 5 სექტემბრის განცხადებაში ვკითხულობთ. განცხადება სამხრეთ ოსეთის ადმინისტრაციულ სასაზღვრო ხაზზე ოძისის გადაკვეთის პუნქტის დახურვიდან ორი წლის გასვლასთან დაკავშირებით გაკეთდა. 

ევროკავშირის წარმომადგენლობის ხელმძღვანელი ხაზს უსვამს, რომ ამ პუნქტის დახურვამდე ადმინისტრაციული სასაზღვრო ხაზი ყოველდღიურად საშუალოდ 400-ჯერ იკვეთებოდა. 

„ბოლო ორი წლის განმავლობაში ახალგორის რაიონის ეთნიკურად ქართველ მოსახლეობას არ შეეძლო ადმინისტრაციული სასაზღვრო ხაზის გადაკვეთა და ნათესავებთან შეხვედრა, პენსიების აღება ან მშობლიურ ენაზე განათლების მიღების უფლების გამოყენება. გარდა ამისა, შეზღუდულია სამედიცინო დახმარების ხელმისაწვდომობა და კვლავ ვიღებთ ცნობებს საკვებისა და მედიკამენტების დეფიციტის შესახებ“, — აცხადებს კარლ ჰარცელი, — „ამ ყველაფრის გათვალისწინებით, ახალგორის რაიონიდან სამედიცინო მომსახურების მიღების მიზნით გადასვლების მარეგულირებელი პროცედურების ბოლოდროინდელი გამარტივება მისასალმებელი მოვლენა იყო“.

ევროკავშირი დარწმუნებულია, რომ გადაადგილების მეტი თავისუფლების უზრუნველსაყოფად COVID-19-ზე ტესტირების გონივრული და ადეკვატური სტრატეგიის შემუშავებაა შესაძლებელი, ნათქვამია განცხადებაში.

დამატებითი ინფორმაცია

პრესრელიზი