ევროკავშირი საქართველოში მართლმსაჯულების ხელმისაწვდომობის გასაუმჯობესებლად #JusticeForAll კამპანიას იწყებს

27 აპრილს ევროკავშირმა და ევროპის საბჭომ ონლაინ კამპანია, #JusticeForAll  დაიწყეს. მისი მიზანი იმ პრობლემების შესახებ ცნობიერების ამაღლებაა, რომლებიც ქვეყანაში მართლმსაჯულების ხელმისაწვდომობის კუთხით დგას.

კამპანიის მთავარი გზავნილი ის არის, რომ მართლმსაჯულება ხილული და უხილავი დაბრკოლებებისგან თავისუფალი უნდა იყოს. ამისათვის უნდა შეიქმნას კეთილგანწყობილი გარემო შეზღუდული შესაძლებლობის მქონე პირთა და უმცირესობათა წარმომადგენლებისთვის. სასამართლო შენობები და მათი განლაგება კი ყველასთვის მაქსიმალურად ხელსაყრელი და კომფორტული უნდა იყოს.

კამპანიის ფარგლებში წარმოდგენილი იქნება იმ შეზღუდული შესაძლებლობების მქონე ადამიანების, უმცირესობათა წარმომადგენლების, ქალებისა და ბავშვების ისტორიები, რომლებიც მართლმსაჯულების წვდომისას დაბრკოლებებს გადააწყდნენ. ეს ისტორიები საქართველოს ევროპის საბჭოს ოფისის ოფიციალურ ონლაინ პლატფორმებზე ქართულ და ინგლისურ ენებზე გამოქვეყნდება.

აღნიშნული კამპანია ევროკავშირის მიერ დაფინანსებული პროექტის, „სასამართლო სისტემის ანგარიშვალდებულებისა და ეფექტიანობის გაუმჯობესება და ადვოკატთა პროფესიონალიზმის ამაღლება საქართველოში“, ნაწილია. ამ პროექტს ევროპის საბჭო ევროკავშირის მიერ დაფინანსებული ინიციატივის,  პარტნიორობა კარგი მმართველობისთვის (2019-2021), ფარგლებში ახორციელებს.

დამატებითი ინფორმაცია

პრესრელიზი

საქართველოში ევროპის საბჭოს ოფისის ოფიციალური ონლაინ პლატფორმები: ვებგვერდი, Facebook-ის გვერდი და Twitter.