ევროკავშირი არააგრარული სტრატაპებისა და ბიზნესებისთვის საგრანტო კონკურსს აცხადებს

ევროკავშირმა არააგრარული სტარტაპებისა და ბიზნესებისთვის საგრანტო კონკურსი დაიწყო. პროექტი საქართველოს რვა მუნიციპალიტეტისთვის,  ახალქალაქის, ბორჯომის, დედოფლისწყაროს, თეთრიწყაროს, ლაგოდეხის, ქედას, ხულოს და ყაზბეგისთვისაა განკუთვნილი.

საგრანტო კონკურსი ევროკავშირის, გაეროს განვითარების პროგრამის (UNDP) და საქართველოს გარემოს დაცვის და სოფლის მეურნეობის სამინისტროს სასოფლო განვითარების სააგენტოს ინიციატივით ტარდება. მისი მიზანი სოფლად ეკონომიკური დივერსიფიკაციის მხარდაჭერა, სტაბილური სამუშაო ადგილების შექმნა და ბუნებრივი რესურსების ეკომეგობრულად გამოყენების ხელშეწყობაა.

სტარტაპებისა და ბიზნესების გაფართოებისთვის განკუთვნილი გრანტების მოცულობა ცალკეული ბენეფიციარისთვის 20,000-დან 340,000 ლარამდე მერყეობს. ენერგოეფექტიანობის ხელშემწყობი ღონისძიებებისთვის გაცემული გრანტების მოცულობა კი 1,500-დან 30,000-მდე ლარს შეადგენს. ორივე შემთხვევაში გრანტის მიმღებებს ბიზნესპროექტის მთლიანი  ღირებულების მინიმუმ 20%-ის თანადაფინანსება მოეთხოვებათ.

საკონკურსო წინადადებების წარდგენის საბოლოო ვადაა 2021 წლის 31 მარტი.

საგრანტო კონკურსი ევროკავშირის ინიციატივის, სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ფარგლებში ტარდება. 179.5 მილიონი ევროს ბიუჯეტის მქონე ინიციატივა საქართველოს სოფლის მეურნეობის და სასოფლო განვითარებას 2013 წლიდან უჭერს მხარს.

დამატებითი ინფორმაცია

პრესრელიზი