ეუთოს თავმჯდომარემ სამხრეთ ოსეთის ადმინისტრაციული სასაზღვრო ხაზი მოინახულა

16 თებერვალს ევროპის უსაფრთხოებისა და თანამშრომლობის ორგანიზაციის მოქმედმა თავმჯდომარემ და შვედეთის საგარეო საქმეთა მინისტრმა, ენ ლინდემ სამხრეთ ოსეთის ადმინისტრაციული სასაზღვრო ხაზის ნაწილები მოინახულა. ის ხურვალეთის ტერიტორიას საქართველოში ევროკავშირის სადამკვირვებლო მისიასთან ერთად ეწვია.

ენ ლინდეს ვიზიტისას მეგზურობას ევროკავშირის სადამკვირვებლო მისიის ხელმძღვანელი, ელჩი მარეკ შჩიგელი უწევდა. ელჩმა ეუთოს მოქმედ თავმჯდომარეს ადმინისტრაციულ სასაზღვრო ხაზთან განვითარებული უახლესი მოვლენების შესახებ საკუთარი მოსაზრებები გაუზიარა. 

თავდაპირველად სოფელ პატარა ხურვალეთში, შემდეგ კი დიდ ხურვალეთში ყოფნისას, ევროკავშირის სადამკვირვებლო მისიის დამკვირვებლებმა ენ ლინდეს და მის დელეგაციას რეგიონში არსებული უშიშროებასთან დაკავშირებული მდგომარეობა აღუწერეს. განსაკუთრებული ყურადღება დაეთმო “ბორდერიზაციის” პროცესს და აღინიშნა, რომ ის ადგილობრივთა გადაადგილების თავისუფლებასა და ადამიანის სხვა უფლებებს  ზღუდავს.

გარდა ამისა, საუბარი შეეხო კონკრეტულ გამოწვევებს, რომლებსაც ადმინისტრაციული სასაზღვრო ხაზის გასწვრივ მცხოვრები მოსახლეობა ყოველდღიურად აწყდება. ეს პრობლემები COVID-19-ის პანდემიამ კიდევ უფრო გააღრმავა. 

ენ ლინდეს ვიზიტისას თან ახლდა სამხრეთ კავკასიაში ეუთოს მოქმედი თავმჯდომარის სპეციალური წარმომადგენელი, ანიკა სოდერი. ორივე მათგანი მიესალმა ევროკავშირის სადამკვირვებლო მისიასა და ეუთოს შორის თანამშრომლობას. მათ კიდევ ერთხელ გაუსვეს ხაზი საკუთარ ერთობლივ მზადყოფნას, ხელი შეუწყონ ერგნეთის ინციდენტების პრევენციის და მათზე რეაგირების მექანიზმის მომდევნო შეხვედრის გამართვას.

დამატებითი ინფორმაცია

პრესრელიზი