დიდი შვიდეულის ლიდერები პუტინის რეჟიმზე და ბელარუსში მის მოკავშირეებზე ეკონომიკურ და პოლიტიკურ ზეწოლას გააძლიერებენ 

27 ივნისს დიდი შვიდეულის ლიდერებმა კიდევ ერთხელ გაუსვეს ხაზი თავიანთ მზადყოფნას, მხარი დაუჭირონ უკრაინის მთავრობას და ხალხს ქვეყნის სუვერენიტეტის და ტერიტორიული მთლიანობის დაცვაში. ისინი ასევე მზად არიან, გააძლიერონ  საერთაშორისო ეკონომიკური და პოლიტიკური ზეწოლა რუსეთის პრეზიდენტის, პუტინის რეჟიმზე და მის მოკავშირეებზე ბელარუსში.

დიდი შვიდეულის ქვეყნების — კანადის, საფრანგეთის, გერმანიის, იტალიის, იაპონიის, გაერთიანებული სამეფოს და ამერიკის შეერთებული შტატების შეხვედრა გერმანიაში 26-28 ივნისს ჩატარდა.

დიდი შვიდეული მიესალმა ევროპული საბჭოს გადაწყვეტილებას უკრაინისა და მოლდოვისთვის კანდიდატი ქვეყნების სტატუსის მინიჭების შესახებ. 

„ჩვენ გავაგრძელებთ ფინანსურ, ჰუმანიტარულ, სამხედრო და დიპლომატიურ მხარდაჭერას და მხარში დავუდგებით უკრაინას იქამდე, სანამ საჭირო იქნება. ამ პროცესში ვალდებულებას ვიღებთ, გამოვავლინოთ გლობალური პასუხისმგებლობა და სოლიდარობა და შევამციროთ რუსეთის აგრესიის საერთაშორისო გავლენა — განსაკუთრებით, ყველაზე დაუცველ ჯგუფებზე“, — აღნიშნეს დიდი შვიდეულის ლიდერებმა უკრაინის მხარდასაჭერად გაკეთებულ სპეციალურ განცხადებაში.

გარდა ამისა, დიდი შვიდეულის ლიდერებმა განაცხადეს, რომ გააგრძელებენ ზეწოლას პრეზიდენტ პუტინის რეჟიმზე და მის მოკავშირეებზე ბელარუსში: „ამით რუსეთს მოვუსპობთ ეკონომიკურ ბერკეტებს უკრაინის წინააღმდეგ ომის საწარმოებლად, ჩვენ კი გავაგრძელებთ ჩვენი კოორდინირებული სანქციების მიზნობრივ გამოყენებას მანამ, სანამ საჭირო იქნება“. 

შეხვედრის მონაწილეები შეთანხმდნენ, რომ უახლოესი დღეებისა და კვირების განმავლობაში გამონახავენ რუსეთის საერთაშორისო ბაზრიდან იზოლირების ახალ გზებს, შეამცირებენ მის შემოსავლებს, გააგრძელებენ სანქციებისთვის თავის არიდების წინააღმდეგ ბრძოლას, შეამცირებენ რუსეთის მიერ ენერგეტიკიდან მიღებულ მოგებას, კოორდინაციას გაუწევენ სატარიფო ზომების მიღებას რუსეთიდან იმპორტზე, უფრო მეტად შეზღუდავენ ქვეყნის წვდომას დიდი შვიდეულის ქვეყნებში წარმოებულ ძირითად ინდუსტრიულ რესურსებზე, მომსახურებებსა და ტექნოლოგიებზე და სანქციებს დაუწესებენ მათ, ვინც ომის დანაშაულებზე და სურსათის უსაფრთხოების კრიზისზეა პასუხისმგებელი. 

დამატებითი ინფორმაცია

პრესრელიზი