ორი წელი და 1,200-ზე მეტი ბენეფიციარი: ყვარლის ევროკლუბი ორი წლის იუბილეს აღნიშნავს

11 ნოემბერს ყვარლის ევროკლუბმა დაარსებიდან ორი წლის იუბილე აღნიშნა. საზეიმო ღონისძიებას დაესწრო ევროკავშირის ელჩი საქართველოში, კარლ ჰარცელი. საპატიო სტუმრებს შორის ასევე იყვნენ ნიდერლანდების, ავსტრიის, საფრანგეთის, თურქეთის და ნორვეგიის ელჩები და ესპანეთის საელჩოს ატაშე საქართველოში.

ყვარლის ევროკლუბი 2019 წელს ახალგაზრდა ევროპელმა ელჩმა, ნიკა გურინმა რეგიონული საკომუნიკაციო პროგრამის, „ევროკავშირის აღმოსავლეთ სამეზობლოს” (EU NEIGHBOURS east)  მხარდაჭერით დააარსა. მომდევნო ორი წლის განმავლობაში ევროკლუბის სხვადასხვა პროექტით და ინიციატივით 1,200-ზე მეტმა ახალგაზრდამ ისარგებლა.

ევროკლუბის მთავარი მიზანია საზოგადოებასა და განსაკუთრებით ახალგაზრდობაში განათლების და განვითარების მხარდაჭერა, სამოქალაქო ცნობიერების ამაღლება, არაფორმალური განათლების ხელმისაწვდომობა და დასავლური ღირებულებების გავრცელება. 

ევროკლუბის მიერ ორგანიზებული საქმიანობის ფარგლებში ადგილობრივ მოსახლეობას საშუალება აქვს, ისარგებლოს ინგლისური ენის შემსწავლელი კურსებით, პროფესიული გადამზადების კურსებით, ღია ბიბლიოთეკებით და სხვა შესაძლებლობებით. 

სამომავლოდ ევროკლუბი გეგმავს, კიდევ უფრო გააფართოოს თავისი საქმიანობა, რათა ყვარლისა და საქართველოს სხვა რეგიონებიდანაც მეტი ადამიანი მოიზიდოს. 

მიმდინარე ან მომავალ ინიციატივებში მონაწილეობის მისაღებად და დამატებითი ინფორმაციისთვის ეწვიე ყვარლის ევროკლუბის ფეისბუქის გვერდს.

დამატებითი ინფორმაცია

ყვარლის ევროკლუბი

ახალგაზრდა ევროპელი ელჩები