Տեղի է ունեցել Հայաստանի եւ ԵՄ-ի միջեւ քաղաքական եւ անվտանգային հարցերով երկխոսության առաջին նիստը

2023թ. հունվարի 26-ին Երևանում կայացել է ՀՀ-ԵՄ քաղաքական և անվտանգային հարցերով երկխոսության առաջին բարձրաստիճան նիստը։

Կողմերն անդրադարձ են կատարել Եվրոպական միության, Հայաստանի և ավելի լայն տարածաշրջանի համար առկա առանցքային անվտանգային հարցերին, մասնավորապես՝ եվրոպական անվտանգության առջև ծառացած մարտահրավերներին, ինչպես նաև Հայաստանի և Ադրբեջանի միջև հարաբերությունների կարգավորմանն առնչվող հարցերին, այդ թվում՝ Լաչինի միջանցքով ազատ տեղաշարժի արգելափակման հետ կապված աճող մարդասիրական մտահոգություններին։

ԵՄ արտաքին գործողությունների եվրոպական ծառայության գլխավոր քարտուղարի տեղակալ Էնրիկե Մորան նշել է. «Այսօր մեկնարկած ՀՀ-ԵՄ քաղաքական և անվտանգային հարցերով երկխոսության առաջին նիստն արտահայտում է արտաքին ու անվտանգային քաղաքականության հարցերում համագործակցությունն ընդլայնելու մեր փոխադարձ հետաքրքրությունը և պատրաստակամությունը աշխատել միասին՝ ի շահ խաղաղության, անվտանգության ու կայունության, հատկապես ներկայիս՝ մարտահրավերներով լի միջազգային համատեքստում, որը բնորոշվում է Ուկրաինայի նկատմամբ Ռուսաստանի պատերազմով»։

Նա հիշեցրել է Հայաստանում ԵՄ քաղաքացիական առաքելություն տեղակայելու մասին վերջերս ընդունված որոշման մասին, որի նպատակը տեղում կայունության ամրապնդմանը նպաստելն է։

Հայաստանի արտաքին գործերի նախարարի տեղակալ Վահե Գևորգյանը նշել է. «ՀՀ միջազգային սահմանների մշտադիտարկման գործում Հայաստանն ամուր համագործակցություն է ակնկալում Հայաստանում ԵՄ առաքելության հետ։ Հայաստանն արժևորում է բոլոր միջնորդական և խթանման գործողությունները՝ ուղղված խաղաղության ու անվտանգության հաստատմանը, ինչն էական է Հայաստանի տարածքային ամբողջականության, Լեռնային Ղարաբաղում հայ բնակչության իրավունքների և անվտանգության ապահովման համար»։

ՀՀ-ԵՄ քաղաքական և անվտանգային հարցերով երկխոսության նիստերը նախատեսվում է անցկացնել պարբերաբար՝ ամենամյա սկզբունքով:

Իմացիր ավելին

Մամուլի հաղորդագրություն