Միջազգային խոշոր ֆինանսական հաստատությունների ղեկավարներ. «Մենք սարսափած և խորապես մտահոգված ենք ռուսական ներխուժմամբ»

«Մենք սարսափած և խորապես մտահոգված ենք Ուկրաինա Ռուսաստանի ներխուժմամբ և դրան հաջորդած ճգնաժամով», – ասվում է միջազգային խոշոր ֆինանսական հաստատությունների ղեկավարների միասնական հայտարարության մեջ:

Հայտարարության տակ ստորագրել են Վերակառուցման և զարգացման եվրոպական բանկի (ՎԶԵԲ) նախագահ Օդիլ Ռենո-Բասոն, Եվրոպական ներդրումային բանկի (ԵՆԲ) նախագահ Վերներ Հոյերը, Եվրոպայի խորհրդի զարգացման բանկի (ԵԽԶԲ) կառավարիչ Կառլո Մոնտիչելին, Արժույթի միջազգային հիմնադրամի (ԱՄՀ) գործադիր տնօրեն Կրիստալինա Գեորգիևան և Համաշխարհային բանկի խմբի (ՀԲԽ) նախագահ Դեյվիդ Մալպասը։

Նրանք նախազգուշացնում են, որ պատերազմը կունենա լայնածավալ ազդեցություն՝ «էներգիայի և սննդի մատակարարումների կրճատումից մինչև գների և աղքատության աճ, ինչպես նաև Ուկրաինայի զանգվածային վերակառուցում, որոնք բոլորը կխոչընդոտեն հետհամավարակային վերականգնմանն ամբողջ աշխարհում»:

«Ամբողջ համաշխարհային տնտեսությունը կզգա ճգնաժամի հետևանքները դանդաղ աճի, առևտրային խափանումների և ավելի կտրուկ գնաճի տեսքով, ինչը հատկապես ծանր հարված կհասցնի ամենաաղքատ և խոցելի խավերին:

Սննդամթերքի և էներգիայի պես բորսային ապրանքների ավելի բարձր գներն ավելի կխթանեն գնաճը:

Երկրները, մասնավորապես՝ Ուկրաինայի հարևան պետությունները, կբախվեն առևտրի ու մատակարարման շղթաների և դրամական փոխանցումների հետ կապված խափանումների, ինչպես նաև փախստականների հոսքի կտրուկ աճի հետ», – ասվում է հայտարարության մեջ։

Միջազգային ֆինանսական հաստատությունների ղեկավարները նաև նշել են, որ իրենց կառույցները հրատապ օգնություն են ցուցաբերել Ուկրաինային և նրա հարևաններին։ Օրինակ՝ ՎԶԵԲ-ը ի պատասխան Ուկրաինայի դեմ պատերազմի հաստատել է նախնական 2 միլիարդ եվրո արժեքով դիմակայունության փաթեթ՝ պատերազմից տուժած մարդկանց անմիջական կարիքները հոգալու և, երբ պայմանները թույլ տան, Ուկրաինայի էական վերակառուցմանը աջակցելու նպատակով:

ԵՆԲ-ը հրատապ արձագանք է պատրաստել ի համերաշխություն Ուկրաինայի, որը ներառում է 668 միլիոն եվրոյի անհապաղ ֆինանսական աջակցություն Ուկրաինայի իշխանություններին և ենթակառուցվածքային նախագծերի պարտավորությունների վերաբաշխում՝ լրացուցիչ 1,3 միլիարդ եվրոյի առաքումն արագացնելու համար: Մինչ այժմ հատկացվել է 329 մլն եվրո։

Իմացիր ավելին

Մամուլի հաղորդագրություն