Հայաստանը 2024 թվականին կհյուրընկալի ՎԶԵԲ-ի գլխավոր միջոցառումը

Վերակառուցման եւ զարգացման եվրոպական բանկը (ՎԶԵԲ) եւ Հայաստանի կառավարությունը ստորագրել են փոխըմբռնման հուշագիր 2024 թվականի մայիսի 14-ից 16-ը ՎԶԵԲ-ի 2024 թվականի հավաքը Երեւանում անցկացնելու մասին։

Երեւանում կայանալիք միջոցառումը կլինի ՎԶԵԲ-ի 33-րդ հավաքը։ Ամենամյա հավաքը ամենակարեւոր միջոցառումն է Բանկի օրացույցում։ Կենտրոնական միջոցառումը Բանկի բարձրագույն մարմնի՝ կառավարման խորհրդի նիստն է, որը կգնահատի Բանկի աշխատանքը եւ կսահմանի ապագա ռազմավարական ուղղությունները:

Հավաքի ընթացքում նախատեսված է նաեւ բիզնես ֆորում, որին կմասնակցեն գործարար համայնքի ներկայացուցիչներ, ներդրողներ, պետական պաշտոնյաներ, լրատվամիջոցներ․ նրանք կմասնակցեն պանելային քննարկումների։ Բացի այդ, ամենամյա ժողովը ներառում է քաղաքացիական հասարակության համար նախատեսված ծրագիր, դոնորների հանդիպում եւ այլ օժանդակ միջոցառումներ:

Ակնկալվում է, որ 2024 թվականին հավաքը Հայաստան կբերի մինչեւ 2 000 մասնակից։

ՎԶԵԲ-ը Հայաստանում առաջատար ինստիտուցիոնալ ներդրողներից է: Բանկն այստեղ շուրջ 2 միլիարդ եվրո է ներդրել 206 ծրագրում՝ աջակցելով մասնավոր հատվածի զարգացմանը եւ էներգետիկայի, ենթակառուցվածքների, հեռահաղորդակցության ու ֆինանսական ոլորտներին:

Իմացիր ավելին

Մամուլի հաղորդագրություն