«EU4Youth զբաղունակություն և կայունություն» նախագիծը վերապատրաստել և աշխատանքի հնարավորություններ է ստեղծել հայաստանցի հարյուրավոր երիտասարդների համար

Ապրիլի 28-ին «EU4Youth՝ զբաղունակություն և կայունություն» ծրագիրն անցկացրեց իր վերջին առցանց համաժողովը, որը նվիրված էր դրա արդյունքների ամփոփմանը: Ծրագրի աջակցությամբ ավելի քան 1000 երիտասարդ Հայաստանում, Բելառուսում և Ուկրաինայում ստացել են անվճար ոչ ֆորմալ կրթություն՝ տարբեր դասընթացների ձևաչափով: Բացի այդ, ծրագիրը պրակտիկայի հնարավորություններ է ստեղծել տարբեր ընկերություններում և կազմակերպություններում, որպեսզի դրա մասնակիցները կարողանան գործնականում կիրառել իրենց ձեռք բերած հմտությունները: Դրա շնորհիվ ծրագրի ավարտին նրանցից շատերն աշխատանք գտան կամ սկսեցին սեփական գործը: Համաժողովի ընթացքում նրանք կիսվեցին իրենց հաջողության պատմություններով:

Ծրագրի հիմնական արդյունքները՝ թվերով.

• վերապատրաստման ծրագրին հաջողությամբ մասնակցել և վկայականներ են ստացել 834 երիտասարդ (այդ թվում 301-ը Հայաստանում).
• մասնագիտական դասընթացներին մասնակցել և վկայական են ստացել 439 երիտասարդ (այդ թվում 154-ը Հայաստանում).
• պրակտիկա են անցել կամ աշխատանք են ստացել 542 երիտասարդ (այդ թվում 281-ը Հայաստանում).
• բիզնես – վերապատրաստում են անցել 206 երիտասարդ (այդ թվում 50-ը Հայաստանում), ինչի արդյունքում մշակվել է 124 բիզնես – պլան (35-ը՝ Հայաստանում), և բացվել է 57 նոր ձեռնարկություն (16-ը՝ Հայաստանում)։

2018-2021 թվականներին «EU4Youth՝ զբաղունակություն և կայունություն Հայաստանում, Բելառուսում և Ուկրաինայում» ծրագիրը նպաստել է երիտասարդության սոցիալապես խոցելի խմբերի զբաղունակության և ձեռներեցության հնարավորությունների բարելավմանը և խթանել նրանց ակտիվ ներգրավվածությունը աշխատաշուկայում: Ծրագիրը ֆինանսավորվել է Եվրոպական միության կողմից՝ Ավստրիական զարգացման գործակալության հետ համատեղ: